ने. सं. ११४४ चौलाथ्व द्वादशी -

थिमि लाय्कू भैलःयात थुगुसी नं निरन्तरता बीगु

येँ – थिमि लाय्कू भैलःयात थुगुसी नं निरन्तरता बीगु जूगु दु । पीन्हय्दँ तक मदिक्क दिनाच्वंगु थिमिया लाय्कू भैलः प्याखं स्थानीय संस्कृतिह्यमि ल्याय्म्हतय् सक्रियताय् छुं दँ न्ह्यः जक पिथनेगु ज्या जूगु खः । थनिं प्यदँ न्ह्यः स्थानीय संस्कृति, सम्पदाप्रेमी ल्याय्म्हतय् सक्रियतां पिदंगु थनया लाय्कू भैलः प्याखंयात थुगुसी नं निरन्तरता बीगु निंतिं थौंकन्हय् थिमिया लाय्कूस्थित आदर्श मा.वि.इ न्हियान्हिथं अभ्यास यायेगु ज्या जुयाच्वंगु दु ।

थुगुसी थ्व हे वइगु गुंलागा सापारुया कन्हय् कुन्हु साउन ३२ गते उगु प्याखं पिथनेगु ल्याखं तीव्ररुपं तयारी जुयाच्वंगु दु । उकुन्हु पित हःगु लाय्कू भैलः प्याखं प्यन्हुतक क्यनी । प्याखं पिथनेगु निंतिं निम्ह दागिं, निम्ह भैलः (भैरव) व ज्यापुगं छम्ह यानाः न्याम्ह प्याखम्वलं न्हियान्हिथं अभ्यास यानाच्वंगु दुसा प्याखं पिथनेगु निंतिं जुयाच्वंगु तयारी नं अन्तिम चरणय् थ्यने धुंकूगु धाःगु दु ।

थुगुसी नं प्याखंयात निरन्तरता बीत जानकारी बीगु ल्याखं जूगु पत्रकार सम्मेलनय् प्याखंया संयोजक अर्जुन श्रेष्ठं प्याखं पिथनेगु निंतिं अन्तिम तयारी जुयाच्वंगु जानकारी बियादिल । थ्व प्याखं मध्यपुर थिमि लागाय छम्ह दानवं हाहाकार न्यंकाच्वंगु व वयात अन्त्य यायेत पिथनेगु यानाच्वंगु व प्याखं पिथनेत बालकुमारिया पूजा यानाः लाय्कू लागां प्याखं पिथनेमाःगु चलन दुगु नं जानकारी वय्कलं बियादिल ।

२०१८ सालय् दकलय् लिपांखुसी छन्हु प्याखं क्यनेधुंकाः वयांलिपा बन्द जुयाच्वंगु थिमिया ल्याय्म्हतय् ग्वाहालि व सक्रियतां थम्हं प्रशिक्षण बियाः पित हयोगु खँ मुतिकुमार श्रेष्ठं कनादिल ।

वइगु साउन ३२ गते बहनिया ७ ताः इलंनिसें प्यन्हुतक लाय्कुलिं थ्व प्याखं पिथनाः बालकुमारी लागाय् न्हिं प्यघौ–न्याघौतक मदिक्क क्यनी । प्याखं पिथनेगु निंतिं पीगू लाखं मल्याक खर्च जुइगु व स्वसः निसें प्यसःम्ह मनूयात भ्वय् नकेमाः । प्याखं पिथनेगु झ्वलय् लछिया दुने जक नीछक्वलं मल्याक नासःद्यःया पुजा यानाः भ्वय् नकेमाःगु प्याखनय् दुथ्याःम्ह छम्ह प्याखंम्वः राजकुमार श्रेष्ठं कनादिल ।