येँया सतुंगलय् छम्ह मचायात कोरोना, संक्रमितत २६७म्ह थ्यन
येँ – नेपालय् कोरोना भाइरसया संक्रमिततय् ल्याः २६७म्ह थ्यंगु दु । शुक्रवाः बहनी येँ नापं थीथी जिल्लाय् ९म्ह थप संक्रमित खनेदुगु दु । येँ १म्ह, पर्साय् ४म्ह, उदयपुरय् १म्ह व दाङय् ३म्हेसित कोरोना संक्रमण जूगु पुष्टि स्वास्थ्य तथा जनसंख्या मन्त्रालयं याःगु दु ।
येँया सतुंगलय् च्वनीम्ह ७दँया मचा, पर्सा वीरगञ्जया ९ व १०दँया मचा व २३ व ४७दँया मिसातय्त कोरोनाया संक्रमण जूगु दु । अथेहे उदयपुर त्रियुगा नगरपालिकाया २५दँया मिजं, दांगया गढवा ४, ५ व तुलसीपुर–७या २३, ३६ व ३४दँया मिजंतय्त संक्रमण जूगु खः । दांगय् कोरोना भाइरसया संक्रमित लूगु थ्व न्हापांगु घटना खः ।
LEAVE YOUR COMMENTS