गुरुपुन्हिकुन्हु गुरुपिंत सम्मान

येँ(नेपालभाषा टाइम्स)- ज्यापु संस्कृति विकास कोषपाखें परम्परागत ६३ गू त्वाःया बाजं गुरुपिंत मंकाःकथं सम्मान याःगु दु । वंगु दिल्लाथ्व पुन्हि (गुरुपुन्हि)कुन्हु छगू ज्याझ्वःया दथुइ परम्परागत ६३ गू त्वाःया गुरुपिंत हनेज्या याःगु खः। मूपाहां येँ महानगर उपप्रमुख सुनिता डंगोलं सम्मानित गुरुपिं सकसितं तगः तपुलिं पुइकाः नगदलिसें सम्मान यानादीगु खः।

उगु हे ज्याझ्वलय् यःमरि पुन्हिकुन्हु जुइगु राष्ट्रिय ज्यापु दिवसया पाःब्वः त्यंगः त्वाः खलःयात लःल्हाःगु खः । थगुने पाः फःगु गोफःत्वालं थुगुसी जुइगु नीक्वःगु राष्ट्रिय ज्यापु दिवसया पाःब्वः त्यंगःत्वाः नायः नायःधनबहादुर महर्जन तिमिलायात लःल्हाःगु खः।

ज्याझ्वलय् उपप्रमुख डंगोलं झीगु म्हसीका जुयाच्वंगु परम्परागत, मौलिक, सांस्कृतिक बाजं, भाषा, कला, संगीत, भेषभूषा, पहिरन, रहनसहन, जात्रापर्व, संस्कृति, सम्पदा झीगु अमूल्यनिधि जूगु व थुकिया संरक्षण याना तयेगु दायित्व नं झीगु हे खः धयादिल ।

ज्याझ्वलय् ज्यापु महागुथि नेपाः येँ महानगर समितिया नायः पंचनारायण महर्जन, मंगल महर्जन लगायतया वक्तापिंसं गुरुया महिमा बारे नुगःखँ तयादीगु खः ।