प्रहरीया गोली लाःम्ह सीवं बर्दिबासय् हाकनं प्रदर्शन

येँ (नेपालभाषा टाइम्स) – महोत्तरीया बर्दिवासय् जूगु प्रदर्शनय् प्रहरी कयेकूगु गोलीं लाःम्ह छम्ह प्रदर्शनकारी सीवं थन हाकनं आन्दोलन तच्वःगु दु । बर्दिवास नगरपालिका १४ य् च्वंम्ह खुदँ दुम्ह छम्ह मचाया हत्या जूगुया दोषीयात कारवाही यायेत माग यासें मंगलवाः प्रदर्शन जूगु खः । प्रदर्शन यानाच्वंपिंत लिनाछ्वयेगु निंतिं प्रहरीं कयेकूगु गोली लानाः बर्दिवास १ या बुद्धिराज न्यौपाने व श्याकम कार्की घाःपाः जूगु खः । न्यौपाने व कार्कीयात तत्काल उपचारया निंतिं हेलिकप्टरय् तयाः येँया ग्राण्डी अस्पतालय् हःगु खःसां न्यौपाने मंगलवाः बहनी हे सीवं बुधवाः सुथं निसें हे थन आन्दोलन तच्वःगु खः ।

प्रदर्शनकारीतय्सं लँय् लँय् टायर च्याकाः राजगमार्गया सतक बन्द यानाबिउगु दुसा थनया पसः, व्यापारिक प्रतिष्ठान फुक्कं बन्द जूगु दु । बर्दिवास-१४ या शहीद आलमया खुदँ दुम्ह म्ह्याय् गलवशा (गुलाव शाह) खातुन आइतवाः बहनी छेँय् हे च्वनाच्वंगु अवस्थाय् तंगु खः । वयात सीम्ह सोमवाः चान्हय् छेँ लिक्कसं च्वंगु झालय् बोराय् तयाः वांछ्वयातःगु लुइकूगु खः । मचायात अपहरण यानाः स्याःगु द्वपनय् बर्दिवास १४, शुभम वस्तीइ हे च्वनाच्वंम्ह २६ दँया अरुणकुमार शाहयात प्रहरीं सोमवाः हे ज्वनेधुंकूगु दु ।

शाहं सोमवाः सनिलय् थःगु स्थायी छेँ गौशाला ५ य् वनाः थः मांअबुयात मचा स्यानाः बिसिउँ वयागु धकाः कनेवं छेँजःपिंसं हे वयात प्रहरीं हे लःल्हानाबिउगु खः । प्रहरीं शाहं क्यनाबिउगु थासं हे मचाया सीम्ह लुइकूगु खः । मचाया सीम्ह लुइधुंकाः स्थानीयतय्सं हत्यारायात सार्वजनिक थासय् हे कारवाही यायेमाःगु माग यासें मंगलवाः सुथं निसें प्रदर्शन सुरु याःगु खः । प्रदर्शनकारीतय्सं शाहया बर्दिवास १४ य् च्वंगु स्वतँजाःगु छेँ नं च्याकाबिउगु खःसा उमिसं मचाया सीम्ह पूर्वपश्चिम राजमार्गय् यंकाः नाराबाजी याःगु खः । थ्व झ्वलय् प्रहरीं पोष्टमार्टमया निंतिं मचाया सीम्ह अस्पताल यंकेमाःगु धाःसां प्रदर्शनकारीतय्सं प्रहरीयात हे अप्पां कयेकेगु सुरु यायेवं गोली कयेकाःगु खँ प्रहरीं धाःगु दु । स्थानीयतय्सं प्रहरीं भीड नियन्त्रण यायेगु निंतिं सामान्य बल छ्यलेगु व मेमेगु उपाय नालेगु मयासे छक्वलं हे गोलीं कयेकूगु द्वपं बियाच्वंगु दु ।

सम्बन्धित बुखँ

LEAVE YOUR COMMENTS