माओवादीइ नं नेतृत्वया संघर्ष !

येँ (नेपालभाषा टाइम्स)- प्रधानमन्त्री लिसें माओवादी केन्द्रया अध्यक्ष पुष्पकमल दाहाल लिपा पार्टीया नेतृत्वय् वइम्ह सु ?
दाहाल लिपाया नेतृत्व कब्जाय् कायेगु लागिं थौंकन्हय् पार्टी दुने थीथी गुट उपगुट व नेतातय् दथुइ अन्तर संघर्ष शुरु जूगु संकेत खने दया वःगु दु । थुकिं यानाः पार्टी दुने न्हून्हू कथंया समीकरण खने दया वःगु दुसा न्हूकथंया कासात नं न्ह्याना वःगु खँ सूत्रं धाःगु दु ।

प्रम लिसें पार्टी अध्यक्ष दाहालं न्हापा पार्टी त्वःता वंम्ह नेत्रविक्रम चन्द विप्लवयात पार्टीइ दुकायेगु लागिं कुतः यानादीवं उकियात निम्ह शक्तिशाली नेतात वर्षमान पुन व जनार्दन शर्मां थःपिनि लागिं खतरा खंकाः न्हू कथंया समीकरण दयेकेत स्वयाच्वंगु संकेत खने दया वःगु दु ।

उखे पार्टीया निम्ह वरिष्ठ नेतात नारायणकाजी श्रेष्ठ व कृष्णबहादुर महराया दथुइ हानं मेगु सत्ता संघर्ष शुरु जुयाच्वंगु खँ सूत्रं धाःगु दु । माओवादीइ दाहाल धुंकाः दकलय् वरिष्ठ नेतात महरा व श्रेष्ठ हे खः । दाहालं नेत्रविक्रम चन्दलिसे स्वापू तयाः खँल्हाबल्हा यायेगु जिम्मा महरायात बियातःगु दु ।

पार्टी अध्यक्ष दाहालं महरायात थथे महत्वपूर्ण जिम्मेवारी बिउगुलिं उकियात विफल यायेगु लागिं नारायणकाजी श्रेष्ठं कुतः यानाच्वंगु खँ धाःगु दु । छुं न्हि न्ह्यः महरा व वय्कःया काययात लुँ काण्डया द्वपं बिउगु नं थ्वहे प्रकरणया छगू अंग खः धाःगु दु । छुं जुयाः

महरा यक्व न्ह्याः वन धाःसा गृहमन्त्री समेत जुयाच्वंम्ह नारायणकाजीं लुँ काण्डयात नं चर्के याये फइगु खँ सूत्रं धाःगु दु । छुं ई न्ह्यः छगू मिसा काण्डय् लानाः ध्याकुनय् लानाच्वंम्ह महरा बुलुहुँ बुलुहुँ हानं राजनीतिइ सक्रिय जुइत सनाच्वंगु दु । वय्कःयात हानं न्हापाया थासय् हयेके मबीगु लागिं पार्टी दुने हे चलखेल जुयाच्वंगु खँ नं सूत्रं धाःगु दु ।

माओवादी दुने दाहालया विकल्प जुइगु लागिं न्ह्यानाच्वंगु थज्याःगु खिंचातानी माओवादीइ न्हापा न्हापा गबलें मजूनिगु खँ नं धाःगु दु ।

मेपिं ल्वाकाः लबः कायेगु खुबी
माओवादी अध्यक्ष पुष्पकमल दाहालयात पार्टीया अन्य नेतातय् दथुइ ब्वलनीगु तनावया लबः कयाः थः टिके जुइगु खुबी दुम्ह नेताया रुपय् कायेगु याः । न्हापा मोहन वैद्य व डा. बाबुराम भट्टराई दथुइ ब्वलंगु कचवंया इलय् नं दाहालं हे सन्तुलन मिले यानाः थः टिके जुइगु ज्या यानाच्वंगु खः । आः भट्टराई व वैद्य निम्हं पार्टीइ मदयेधुंकल ।

नापं महाधिवेशन न्ह्यःने थ्यंकः वःगुलिं थःगु अवस्था क्वातुका तयेमाःगु स्थिति नं न्ह्यःने दु । थज्याःगु अवस्थाय् दाहालं गनं न्हापा थें हे निम्ह नेतातय्त ल्वाकः मेगु छुं लबः कायेत्यंगु जकं मखुला धइगु आशंका नं याना हःगु दु । वय्कःपाखें खतरा महसुस याःपिं वर्षमान पुन व जनार्दन शर्मा निम्हं हे दाहालया अतिकं विश्वासपात्रपिं खः । दाहालया थ्व दाउ थुइकाः हे पुन व शर्मा छथाय् च्वनेगु कथं तयारी यानाच्वंगु अनुमान नं याना हःगु दु ।