कांग्रेसपाखें आन्दोलन घोषणा
साउन ३ गतेनिसें थीथी चरणय् देय्न्यंकं प्रदर्शन
येँ – प्रमुख प्रतिपक्षी दल नेपाली कांग्रेसं सरकार विरुद्ध देय्न्यंकं सतक आन्दोलनया घोषणा याःगु दु । मंगलवाः पार्टी कार्यालयय् च्वंगु पार्टीया भातृ संगठनया पदाधिकारीतय् बैठकं सरकारया अधिनायकवादी व जनविरोधी क्रियाकलाप विरुद्ध आन्दोलन यायेगु ज्याझ्वः तयार याःगु खः । बैठकं थ्वहे वइगु साउन ३, ५ व ८ गते न्हिनय् येँया माइतीघर मण्डलाय् विरोध प्रदर्शन यायेगु घोषणा याःगु दु ।
३ गते प्रजातन्त्रवादी प्राध्यापक संघ नेपाल व प्रजातन्त्रवादी चिकित्सक संघया ग्वसालय् ज्याझ्वः जुइसा ५ गते तरुण दलया ग्वसालय् ज्याझ्वः जुइ । अथेहे लिपांगु न्हि ८ गते कांग्रेसया येँ, यल व ख्वप जिल्ला समितिया ग्वसालय् विरोध प्रदर्शन यायेगु निर्णय याःगु दु ।
अथेहे साउन १५ गते फुक्कं जिल्ला सदरमुकामय् विरोध प्रदर्शन यायेत पार्टीया फुक्कं तहया समितितय्त निर्देशन बिउगु दु ।
कांग्रेस महामन्त्री डा. शशांक कोइरालां म्हिगः मंगलवाः छगू विज्ञप्ति जारी यासें संघीय सरकार व प्रदेश सरकारं तःधंगु संघर्षं चूलाःगु लोकतान्त्रिक संविधानया भावना व मर्म कथं न्ह्यायेगु पलेसा कानुनी शासनया खिल्ली उडे यानाः यःयःथे ज्या याःगु द्वपं बिउगु दु ।
विज्ञप्तिइ डा. गोविन्द केसीया अनसन व आन्दोलनं ब्वलंकूगु परिस्थितियात थःपिंसं गम्भीर रुपं कयागु दु धासें देउवा सरकारं हःगु चिकित्सा अध्यादेश हुबहु विधेयकया रुपय् हयेमाःगु माग नं यानातःगु दु । अनसनरत डा. गोविन्द केसीया जीवन रक्षाया माग यासें कांग्रेस समर्थित नेवि संघं म्हिगः नं येँय् प्रदर्शन याःगु खः।
अथेहे ओली सरकार गैरजिम्मेवारी तरिकां प्रस्तुत जूगु धासें कांग्रेसं प्रेस स्वतन्त्रता, कानून माने यानाः थःपिनिगु क्रियाकलाप न्ह्याके दइगु स्वतन्त्रयात बन्देज तःगु विरोधय् सडक आन्दोलनय् वनेमाःगु खँ नं विज्ञप्तिइ न्ह्यथनातःगु दु ।
‘पार्टीं सरकारया बचाउ मयाः’
विपक्षी पार्टीत सरकारया विरुद्ध सतकय् कुहां वयेधुंकाः नं पार्टी दुने सुनां नं सरकारया बचाउ मयाःगु खँय् प्रधानमन्त्री लिसें नेपाल कम्युनिष्ट पार्टीया अध्यक्ष केपी ओलीं दुःख प्वंकादीगु दु । म्हिगः पार्टीया नेता व कार्यकर्तातय् मंकाः मुँज्याय् न्ववासें पार्टीपाखें यानाच्वंगु बांलाःगु ज्यायात पार्टीया सुं हे नेता व कार्यकर्तातय्सं पिने बांलाक प्रस्तुत मयाःगु खँय् नं गुनासो यानादिल ।
दुई तिहाइ बहुमत दुगु वर्तमान सरकारं न्हापा गबलें मजूनि कथं ज्या यानाच्वंगु दुसां विपक्षीतय्सं अनावश्यक मुद्दा ल्ह्वनाः सरकारया विरोध यानाच्वंगु द्वपं नं वय्कलं बियादिल ।
LEAVE YOUR COMMENTS