राज्ययन्त्र व प्रशासनय् स्वार्थ पुचः हावी
राज्यं थःत स्वतन्त्र, निष्पक्ष, इमान्दार धकाः ब्वयाच्वनी । उलि जक मखु चीमिपिं, ल्यूने लाःपिं अले शोषितपीडितपिनि पँ लीगु, इमित हे तिबः बीगु ज्या यायेगु खः धकाः नं ब्वयाच्वनी । तर थ्व वास्तविकता मखु, राज्य धइगु वर्ग विभाजित समाजय् निगू वर्गया दथुइया प्रत्यक्ष वा परोक्ष ल्वापुया समाधान जुइमफया पिदंगु छगू यन्त्र खः धकाः लेनिनं क्यनाबिल ।
निथी वर्गयात नं कःघानाः न्ह्यायेफुगु निथीसिकं च्वय्या अंग जुयाः क्यनीगु ज्या राज्यं याइ । तर वास्तविकताय् न्ह्याबलें छगू वर्गया सेवा याइ । लेनिनं धाःगु थ्व वर्गीयताया खँ झीथाय् देसय् स्वयेबलय् जातीय, वर्गीय, लैंगिक, धार्मिक, साँस्कृतिक आदि अनेक कथं सत्य साबित जुयाच्वंगु दु । तर आः झीसं खनाच्वनागु अनेक घटनाक्रमयात स्वयेबलय् आः खँ थुलिजक मखयेधुंकल ।
थुकी दुने अनेक स्वार्थ पुचःतय्गु प्रत्यक्ष, अप्रत्यक्ष घुसपैठ जुयाच्वनेधुंकल । व्यापारीतसें दलया नेतातय्त चन्दा बियाः नेतात ल्हाःतय् कायेगु जक मखु, थःपिंहे संसदय् वनीगु तकं जुल । अले गुलिखे बैंकरतहे संसदय् वनाः उकिया दुनेया समितिइ च्वनाः थःत छिंकथंया ऐन दयेकेगु ज्या यात धकाः बैंकया सञ्चालक समितिइ दुपिं संसदय् च्वनेमज्यू धाल ।
थथे धाःबलय् सञ्चालक समितिइ थः चम्चा तयाः न काइते ल्याखं थः कानुन पालक जुया नं क्यन । तर थुलि जक मखु, मेखे अपराधी पुचः, डन पुचः तकं राजनीतिइ घुसपैठ जुयावःगु दु । हानं न्हापा नेता जुयाच्वंपिं आः नेताया लिसेलिसें मेडिकल डन जुयाः पिहाँ वःगु नं खनेदत ।
थुकथं जुयावंबलय्हे निर्मला बलात्कार प्रकरण, ३३ किलो लुँ काण्ड थुज्वःगु खँय् सरकार लाचार जूगु खः धकाः थुइके थाकु मजू ।
विधेयक लित काःगु इलय् भूमि व्यवस्था मन्त्री पद्मा अर्यालं दुगु विधेयक लाकाकायेधुंकल आः हानं छुकिया खारेजी धयादिल । वास्तवय् छम्ह मन्त्रीया नितिं विधेयक धइगु नियमित ज्याखँ थें जक जुइमाःगु खः । थुुज्वःगु कथंया मोह वा थःगु भावानात्मक सम्बन्ध क्यनेमाःगु छुं आवश्यकता मदयेमाःगु खः ।
थ्वहे नजर तयाः सरकारं लित काःगु गुठी विधेयकयात स्वयेबलय् नं थुकिया ल्यूने भूमाफियाया तःगु स्वार्थ पुचः खटे जूगु दु धकाः थुइके थाकु जुइमखु । गुठी विधेयकय् न्हापा लालमोहर, सनद, सवाल, रुक्का, शिलापत्र, सम्झौता न्ह्यागु यानाः दयाच्वंगु दुसां आः गुथियारतय्गु गुगं हक दइमखुत धकाः च्वयातल ।
थ्व झी सकसिंगु नितिं तसकंहे आपत्तिजनक व गुगुं हालतय् नं स्वीकार्य मजुइगु खँ खः । तर थ्व सवालय् सुं नं मन्त्री व नेतां छुं न्ववाःगु मदु । गुथि विधेयक सम्बन्धी विवाद पिदनेवंहे उकियात प्रतिरक्षा यासें मन्त्रीतय्स्र धाल– जिमिसं संविधानया धारा २९० या अधिकार छ्यलाः हे गुथिसम्बन्धी विधेयक हयागु खः । जिमिसं संविधान कथंहे ज्या यानागु खः ।
मन्त्री भाजुमय्जुपिन्त असंवैधानिक ज्या यात धकाः सुनां धाल ? विधेयक हयेगु खँ संविधानकथं पाय्छि मजू धकाः सुनां धाल ? वय्कःपिनिगु खँ ला ख्येँ त्वपुयाच्वंम्ह कुकु माखाया न्ह्यःने वनेवं ख्येँहे लाक वल धकाः हालीथें अले क्वँय् न्ह्ययाच्वंम्ह खिचाया न्ह्यःने वनेवं क्वँय्हे लाकः वल धकाः झम्टे याः वःथेंया खँ जुल ।
थुकिं मन्त्री भाजु मय्जुपिसं छु स्वार्थ कःघानाच्वंगु दु? धइगु न्ह्यसः ब्वलंकाब्यूगु दु । खँ थुलि जक मखु, २०७२ सालं वःगु संविधानय् स्वास्थ्यसम्बन्धी कानुन दयेकेगु धकाः च्वयातःगु मदु, शिक्षासम्बन्धी कानुन दयेकेगु धकाः च्वयातःगु मदु, प्रशासन सम्बन्धी कानुन दयेकेगु धकाः च्वयातःगु मदु, गुथिसम्बन्धी कानुन जक दयेकेगु धकाः च्वयातयेमाःगु छाय्? व नं विविध धइगु भागया नं लिपतय् स्वचाकेमाःगु छाय् ? थ्व ज्या सुनां यात वा याकल?
हानं गुथि धइगु ला भूमि मखु । तर धारा १९० स गुथिया मूलभूत मान्यताय् असर मलाइगु यानाः गुथिया जग्गाय् भोगाधिकार दुपिं किसानत व गुठीया आधिकारिकता सम्बन्धय् संघीय संसदं कानुन दयेकेगु धकाः खँ च्वयातःगु दु । थुकिं नं संविधानय् च्वकीगु निसें कयाः विधेयक हयेगु तक अले दाङ्गय् काउन्टर आन्दोलन चले यायेगु तक ज्याय् गुगुं भूमिगत भूमाफिया पुचः सनाजूगु दु धइगु खँ खनेदु ।
बालुवाटारया ललितानिवास जग्गा प्रकरणय् २०४७ सालय् कृष्ण प्रसाद भट्टराईया पालंनिसें २०६६ सालय् माधव नेपाल व वयांल्यू डा. बाबुराम भट्टराईया पालय् तक ताहाकःगुहे प्रोजेक्ट दुगु खनेदत । गुथि विधेयक सम्बन्धय् नं उकथंयाहे प्रोजेक्ट दुगु जुइमाः । गुठी विधेयकया समर्थनय् गुगु भूमि अधिकार धकाः संगठन पिहाँ वल व पुलांगु किसान संगठन न मखु, न्हूगु काचाकाचां दयेकूगु संगठन नं मखु ।
गणतन्त्र वयेधुंकाः दयेकूगु संगठन जुयाच्वन । थुकिं थुज्वःगु संगठन नं उगुहे प्रोजेक्टया छगू अंग जुइमाः । गुथि विधेयकया विरोधय् नेवाःत दनावःगु व थुकिं व्यवस्था तक नं उल्टे जुइफुगु खतरा खनेदयाः सरकारं विधेयक लित काल । तर नेवाःतसें खारेजीया हे माग यात । विधेयक लित काःगु इलय् भूमि व्यवस्था मन्त्री पद्मा अर्यालं धाःसा विधेयक प्रति थःगु मोह हे क्यनादिल ।
वय्कलं दुगु विधेयक लाकाकायेधुंकल आः हानं छुकिया खारेजी धयादिल । वास्तवय् छम्ह मन्त्रीया नितिं विधेयक धइगु नियमित ज्याखँ थें जक जुइमाःगु खः । थुुज्वःगु कथंया मोह वा थःगु भावानात्मक सम्बन्ध क्यनेमाःगु छुं आवश्यकता मदयेमाःगु खः । थुकथं गुथि विधेयकया सम्बन्धय् सत्ता पक्षया मन्त्री व छूं सांसदतय्त भूमिगत पुचलं ल्हाःतय् कयातःगु दु धइगु खँ खनेदत ।
असार ४ गते फिब्वः ख्यलय् जूगु नेवाःतय्गु अपार जनप्रदर्शन लिपा सरकार लिचिलेत ला वाध्य जुल । मन्त्री मय्जुं सरोकारवालात नं तयाः मज्यूगु दफा हीकाः हयेगु खँ धयादिल । तर अथे दफा हीकल धाःसा स्वार्थ पुचःया स्वार्थ पूवनी ला? यदि स्वार्थ पुचःया स्वार्थहे पूमवनीगु खःसा उगु विधेयक हानं छाय् हइ ? उगु स्वार्थ पुचलं ला नेवाःत गुबले कमजोर जुइ, उगु ताक ला स्वयाच्वनीगु जुल ।
गुठी विधेयक खँ सिकं न्ह्यः ला मेडिकल कलेज चायेकेगु खँय् स्वार्थ पुचःया चलखेल जूगु व उकी डा. गोविन्द केसी तक्वःतक अनसन च्वनेमाःगुृ खँ खनेदुगु खः । थुकिं यानाः नेपाःया राज्य धइगु हे स्वार्थ पुचःया स्वार्थ साधन यायेगु यन्त्र साबित जुजुं वनीगु खतरा खनेदुगु दु । नेपाः देय्या सपूत व सच्चा राष्ट्रवादी नेवाःतय्गु नितिं थ्व चिन्ताया विषय जूगु दु ।
LEAVE YOUR COMMENTS