थम्हं थःत चिनाः अपहरण !

येँ – थनया मनहरा खुसिइ ल्हाः तुति चिनातःगु अवस्थाय् लूम्ह छम्ह ल्याय्म्हं खालि नाटक जक याःगु खँ सीदुगु दु । ख्वपया लोकन्थलीइ च्वनीम्ह २७ दँया मनिष भण्डारीयात म्हिगः न्हिनय् कोटेश्वरया मनोहर खुसिइ लुइकूगु खः । प्यन्हु न्ह्यवंनिसें तनाच्वंम्ह भण्डारीं आइतवाः कलाःयात फोन यानाः वासः ज्वनाः छेँय् वनेत्यनागु खँ धाःगु खः ।

व धुंकाः दाजुयात फोन यानाः थः अपहरणय् लाःगु खँ कन । थुकिं यानाः छेँजःपिं आँटे चायाः प्रहरीयात खबर यात । प्रहरीं मोबाइल नम्बरं लोकेसन ट्राय्क यात । तर भण्डारीयात सुनानं अपहरण याःगु मखुसें थम्हं हे अपहरणया नाटक याःगु सी दत । प्रहरीं भण्डारीयात मालाच्वंगु इलय् हे भण्डारीया नम्बरं दाजुम्हेसित एसएमएस वल, ‘छिमि किजायात …..निर्देशनय् अपहरण यानागु दु, तर स्याये चाहिँ मखु ।’

छेँजःपिंसं थ्व सुचं प्रहरीयात बिल । मखुगु लोकेसनया सुचं बीगु, अपहरण यानागु दु, तर स्याये मख धायेगु एसएमएस वयेवं प्रहरीं थ्व घटनायात शंकास्पद रुपं काल । वयां लिपा म्हिगः न्हिनय् आकाझाकां कोटेश्वरया मनोहरा खुसि सिथय् छम्ह मनुखं गुहार फ्वनाच्वंगु तायेदत । स्थानीय जनतां प्रहरीयात खबर यात ।

प्रहरी थ्यंकाः ल्हाः तुति चिनातःगु अवस्थाय् उम्ह मनूयात उद्धार यात । अपहरणय् लाःम्ह धाःम्ह भण्डारी वहे लानाच्वन । व थःगु हे ल्हाः व तुतिइ खिपतं चिनाः अन च्वनाच्वंगु लानाच्वन । भण्डारीयाके मानसिक समस्या खनेदुगुलिं म्हिगः हे प्रहरीं वयात छेँजःयात जिम्मा बिउगु दु ।

सम्बन्धित बुखँ

LEAVE YOUR COMMENTS