गुथि विधेयकयात कयाः सुझाव संकलन शुरु

येँ – ज्यापु महागुथि, नेपाः येँ महानगर समितिया ग्वसालय् गुथि विधेयकयात कयाः अन्तक्र्रिया ज्याझ्वः यासें सुझाव संकलन नं याःगु दु । समितिं त्वाः त्वालय् वनाः गुथि विधेयकयात कयाः अन्तक्र्रिया नापं सुझाव संकलन यायेगु ज्याझ्वः न्ह्याकूगु खः । थ्व झ्वलय् समितिं त्यंगः त्वालय् दकलय् न्हापां थुकथंया ज्याझ्वः याःगु खः ।

उगु ज्याझ्वलय् ज्यापु महागुथिया कानून कवःया युद्धमान महर्जन, जुजुकाजी महर्जन, मोहिनी महर्जन, लिना डंगोलपिंसं गुथि विधेयकयात कयाः थःथःगु खँ तयादीगु खः । ज्याझ्वलय् समितिया निवर्तमान नायः कुलबहादुर महर्जन, सचिव मणिकण्ठ महर्जनं विधेयकया थीथी पक्षयात कयाः न्ह्यसः तयादीगु खः ।

ज्याझ्वलय् त्यंगः त्वाःया नायः धनबहादुर तिमिला व न्वकु ज्ञानीबाबु महर्जनं नं थःगु नुगःखँलिसें विधेयकयात निंतिं सुझाव बियादीगु खःसा महागुथिया येँ महानगर समितिया कार्यवाहक नायः नानीहिरा महर्जनं महागुथिं याना वयाच्वंगु थीथी ज्याझ्वः व गुथिइ मिसातय्सं म्हितेमाःगु भूमिकाया बारे थःगु विचाः तयादीगु खः ।