चर्च ब्वाइजयात न्हापांगु कुतलय् हे ए डिभिजन लिग उपाधी

येँ (रासस)- ए डिभिजन लिगया थुगुसी तिनि बढुवा जूगु चर्च ब्वाइज युनाइटेड क्लबं सहिद स्मारक ए डिभिजन लिग उपाधी त्याकूगु दु । दशरथ रंगशालाय् मंगलवाः जूगु कासाय् थ्रीस्टार लिसे गोलरहित बराबरी कासा म्हितेवं चर्च ब्वाइजं लिगया छगू कासा म्हिते ल्यंदनिबलय् हे उपाधी ल्हातय् लाकूगु खः । चर्च ब्वाइजयात उपाधी त्याकेगु निंतिं १ अंक जक माःगु खः । थ्रीस्टारलिसे बराबरी म्हितेवं चर्च ब्वाइजं याउँक उपाधी त्याकूगु खः ।

सी डिभिजन निसें लगातार विजेता जुया वःगु चर्च ब्वाइज शीर्ष लिग म्हितूगु दँय् हे च्याम्पियन जूगु निगूगु क्लब जूगु दु । थ्वयां न्ह्यः मनाङ मस्र्याङ्दीं नं ए डिभिजनय् बढुवा जूगु दँय् हे च्याम्पियन जूगु खः ।

वि.सं. २०६६ इ स्थापना जूगु चर्च ब्वाइज क्लब सी डिभिजनय् छनोट जुइत हे न्याक्वः तक असफल जूगु खः । थ्व लिपा वि.सं. २०७६ य् सी डिभिजनय् छनोटया उपाधी त्याकूगु चर्च ब्वाइजं २०७७ य् सी डिभिजन त्याकाः बी डिभिजनय् बढुवा जुलसा २०७८ य् बी डिभिजन त्याकाः ए डिभिजनय् बढुवा जूगु खः ।

डबल राउन्ड रोबिन लिगया आधारय् न्ह्याःगु ए डिभिजनय् लिगय् चर्च ब्वाइजं २५ गू कासा म्हिताः ४५ अंक काःगु दु । निगू कासा म्हिते ल्यंदनिगु मच्छिन्द्र क्लबया ३९ अंक जक दु । चर्च ब्वाइज हेड टु हेडय् मच्छिन्द्र स्वयां न्ह्यःने दु उकिं मच्छिन्द्रं निगुलिं कासा त्याकूसां चर्च ब्वाइजयात लिउने लाके मफइगु जुइवं छगू कासा म्हिते न्ह्यः हे च्याम्पियन जूगु खः । चर्च ब्वाइजं लिगया २५ गू कासाय् १२ गू त्याकूगु खःसा च्यागू बराबरी म्हितूगु खः । अथेहे प्यंगुलिइ धाःसा पराजित जूगु खः ।