नेपाः ओमानपाखें पराजित

येँ – विश्वकप क्रिकेट लिग २ अन्तर्गत म्हिगः निसें सुरु जूगु त्रिकोणात्मक शृङ्खलाया न्हापांगु कासाय् नेपाः ओमान पाखें पराजित जूगु दु । किपूया क्रिकेट मैदानय् जूगु कासाय् नेपाःयात ओमानं १८ रनं पराजित याःगु खः ।

ओमानं न्हापां ब्याटिङ्ग यासें निर्धारित ५० ओभरय् ९ विकेटया क्षतिइ १९७ रन दयेकूगु खः । लिसलय् ब्याटिङ्ग याःवःगु नेपाः ४६.५ ओभरय् १७९ रन जक दयेकाः अलआउट जूगु खः ।

नेपाःया निंतिं म्हिगः करण केसीं प्यंगू विकेट काःगु खःसां नेपाःया ब्याटिङ्ग धाःसा बांमलात । निम्ह प्रारम्भिक ब्याट्सम्यानत दोहोरो अंकया रन हे दयेके मलानिवं आउट जूगु खः । अथेहे कप्तान ज्ञानेन्द्र मल्लं मुक्कं १२ रन दयेकलसा अनुभवी कासामि पारस खड्का ला ३ रनय् हे आउट जुल ।

नेपाःया दकलय् अप्वः शरद भेषावकरं ५५ रन दयेकूगु खः । भेषावकरं १०८ बल थ्वाःगु खः । भेषवाकर अन्तर्राष्ट्रिय एकदिवसीय घरेलु मैदानय् अर्धसतक थ्वाःम्ह न्हापांम्ह नेपाली कासामि नं जूगु दु । अथेहे दिपेन्द्र सिंह एरीं ५७ बल म्हिताः न्यागू चौका व छगू छक्काया ग्वाहालिं ३६ रन दयेकल ।

ओमानया निंतिं दकलय् अप्वः मोहम्मद नदिमं रन थ्वाःगु खः । नदीमं ९६ बलय् अविजित ६९ रन थ्वाःगु खः ।

सम्बन्धित बुखँ

LEAVE YOUR COMMENTS