‘नाडा अटो शो २०१९’ जुइगु

येँ – नाडा अटोमोबाइल्स एशोसिएसन अझ नेपालं थ्वहे वइगु भदौं १० गते निसें सवारी साधनया कुम्भ मेला ‘नाडा अटो शो २०१९’ ज्याझ्वः याइगु जूगु दु । नाडां म्हिगः येँय् पत्रकार सम्मेलन यानाः वइगु भदौं १० गतेनिसें १५ गते तक भृकुटी मण्डपय अटो शो यायेगु जानकारी बिउगु खः । अटो शोलय १६० गू स्टल दइगु खँ नं पत्रकार सम्मेलनय् जानकारी बिउगु दु ।

अटो शोलय् २३ गू ब्राण्डया प्यचाः दुगु सवारी साधन, १९ ब्राण्डया निचाः घःचाः दुगु सवारी साधन, १२ गू ब्रान्डया लुब्रिकेन्ट, ९ ब्रान्डया टायर, ५ गू ब्रान्डया ब्याटरी, १४ गू ब्राण्डया पार्टपूर्जा लिसे ग्यारेज उपकरण व १३ गू वित्तिय संस्थाया स्टल दइ । नाडाया अध्यक्ष शम्भुप्रसाद दाहालं नाडा अटो शो फुकसिया उत्सव जूगुलिं थुकियात सकस्यां महत्व बिउगु खँ कनादिल ।

नाडा अटो शो आधुनिक जुयाः वनाच्वंगु व वंगु दँय् ७१ स्टल दुगु खःसा थुगु दँया ९५ स्टल दइगु खँ नं वय्कलं कनादिल । अटो शोलय् न्हूगु व पुलांगु न्यागू ब्रान्डया विद्युतीय व हाइब्रिड गाडी दइगु खँ धाःगु दु । थुुगु संस्करणया मू प्रायोजक शीर्ष सर्भो क्लास लुब्रिकेन्टस् खः ।

नाडा मोहनियात लक्षित यानाः ग्वसाः ग्वःगु अटो शोलय् गाडीया न्हूगु मोडल सार्वजनिक याइगु व गाडी न्याइपिंत थीथी कथंया छुट बीगु खँ धाःगु दु । अटो सोलय् ७५ हजार दर्शकं अवलोकन याइगु अनुमान नाडां याःगु दु ।

 

सम्बन्धित बुखँ

LEAVE YOUR COMMENTS