शेयर लगानीइ अनिवार्य प्यान तुरन्त लागू मजुइगु संकेत

येँ – शेयर लगानीकर्तातय्सं वैशाखं निसें अनिवार्य प्यान (स्थायी लेखा नम्बर) कायेगु निर्णयय् हिउपाः वइगु सम्भावना खनेदुगु दु । नेपाल धितोपत्र बोर्ड सरोकारवाला निकायलिसे याःगु सहलहय् आन्तरिक राजश्व विभागया प्रतिनिधिपिंसं लगानीकर्तातय्त विश्वासय् कयाः जक प्यान लागू यायेगु खँ धाःगुलिं वैशाखं निसें अनिवार्य प्यान कायेमाःगु निर्णय छुं लिज्यांवनेफुगु खनेदुगु खः ।

आन्तरिक राजश्व विभागं लगानीकर्तातय् विश्वासय् जक प्यान लागू यायेगु धाःगुलिं सोमवाः शेयर बजाः सामान्य थहां वंगु दु । सोमवाः बजाः बन्द जूगु इलय् तक नेप्से परिसूचक ०.६७ अंकं थहां वंगु खः । सोमवाः नं कारोवार सुरु जूगु इलय् बजाः कुहां हे वंगु खःसां प्यान बारे जूगु सहलहया खँ पिहां वयेवं सामान्य थहांवंगु खः ।

वैशाखं निसें लगानीकर्तातय्सं अनिवार्य प्यान कायेमाःगु निर्देशन वयेवं लगानीकर्तात तम्वयाच्वंगु खः । दत्या न्ह्यव निसें कुहां वयाच्वंगु शेयर बजाः प्यानया कारणं नं थप कुहां वंगु खँ लगानीकर्तातय्सं धया वयाच्वंगु दु । लगानीकर्तातय्सं ऐच्छिक रुपं जक प्यान लागू यायेमाःगु माग याना वयाच्वंगु खः ।