ख्वपय् पर्यटकतय् बसाइ ताहाकयेकेगु हाथ्या
ख्वप – येँ नं ३२ किलोमिटर कज तापाक लाःगु प्राकृतिक सुन्दरतां जाःगु नगरकोट आकर्षक गन्तव्य जूसां थुकिं पर्यटनया माध्यमं अपेक्षित लबः कायेफुगु मदुनि । राजधानीया उकुसमुकुस वातावरणं रमणीय थासय् वनाः आनन्द कायेगु इच्छा सुया जक मदइ । थुकिया निंतिं बांलाःगु गन्तव्य नगरकोट खः । रमणीय वातावरण, डाँडाकाँडा, थनं खनेदइगु हिमशृङ्खलाया मनोरम दृश्यं न्ह्याम्हेसितं आकर्षण याइ ।
समुद्री सतहं २१७५ मिटर च्वय् लाःगु नगरकोटं सूद्र्यः लूगु, सुद्र्यः लुकुंबिउगु लिसें सगरमाथा व मेमेगु नांजाःगु हिमाल स्वयेफइ । थनं सगरमाथालिसें अन्नपूर्ण, मकालु, गणेश, लाङटाङ, जुगल, रोलवालिङ लगायतया क्षेत्रया हिमालया रमणीय दृश्य खनेदु ।
थज्याःगु न्ह्यइपुगु रमणीय थाय् जूसां अन्तर निकाय दथुइ समन्वय मजूगु, पूर्वाधार विस्तार व बजार व्यवस्थान लिसे पर्यटकतय्त बसाइ तब्याकेगु वातावरण दयेके मफुगुलिं नगरकोटय् पर्यटन विकास जुइ मफयाच्वंगु खँ सरोकारवालातय् धापू दु । राष्ट्रिय सञ्चार केन्द्रं नकतिनि जक नगरकोटय् हे ग्वसाः ग्वःगु ‘भक्तपुर पर्यटन विकासया सम्भावना व अवसर’ विषयय् जूगु अन्तक्र्रियाय् नगरकोट क्षेत्रया समग्र पर्यटनविकासया लागि एकीकृत योजनाया लिसें प्रभावकारी ज्याझ्वः हयेमाःगु बिचाः तःगु दु ।
ख्वपया छगू महत्वपूर्ण पर्यटकीय गन्तव्य कथं नगरकोटयात नं कायेगु याः । विश्व सम्पदाय् सुचिकृत ख्वप लाय्कू व चाँगुनारायणय् नं पर्यटकतय् भीड जुइगु याः । तर थन थ्यंपिं पर्यटकतय्त थनं मेथाय् यंकाः बसाइ ताःहाकः यायेगु छुं योजना मदु । उकिं थन थ्यंपिं पर्यटकत घौछि निघौ च्वनाः छगः बोटल लः, छगू कप चिया वा कफी त्वनाः लिहां वनेगु यानाच्वंगु दु । ख्वपया हरेक गन्तव्यय् छन्हु छन्हु च्वनेगु वातावरण दयेकेफत धाःसा पर्यटनपाखें गाक्क आम्दानी यायेफइगुलिसें रोजगारी नं सिर्जना यायेफइगु निश्चिछ दु ।
ख्वप जिल्ला समन्वय समितिया संयोजक नवराज गेलालं ख्वपय् वइपिं पर्यटकतय् बसाइ ताहाकः यायेगु मू चुनौति जुयाच्वंगु खँ धयादीगु दु । ‘ख्वपय् वइपिं पर्यटकतय्सं चिया व कफी बाहेक मेगुलिइ खर्च याइमखु, घौछि निघौ चाःहिलाः लिहांवनी । उमिगु बसाइ ताःहाकः यानाः खर्च यायेगु वातावरण दयेकेगुपाखे सकसिया ध्यान वनेमाः’ वय्कलं धयादिल । वय्कलं ख्वप व जःखः क्षेत्रया पर्यटन विकासया निंतिं केन्द्र सरकार व प्रदेश सरकार दथुइ समन्वय यानाः योजनावद्ध ज्याझ्वः हये आवश्यक जूगु खँ कनादिल ।
चाँगु नारायण नगरपालिकाया प्रमुख सोमप्रसाद मिश्रं ख्वपय् वयाः निघौ च्वनीपिं पर्यटकतय्त म्होतिं नं छन्हु च्वनेगु अवस्था हयेफत धाःसा आर्थिक लाभ कायेफइगु खँ धयादिल । वय्कःया कथं आर्थिक दँ २०७५÷७६ य् ३२ हजार पर्यटक नगरकोट थ्यनेधुंकूगु दु । छम्ह विदेशी पर्यटकपाखें १५०० तका शुल्क कायेगु यानाच्वंगु दु । ख्वप नगरपालिकां पर्यटकनपाखें हे दँय् ३० करोड राजश्व म्हयाच्वंगु दु ।
ख्वप वइपिं स्वब्वय् छब्व पर्यटक नगरकोट वनेगु यानाच्वंगु दु । ख्वपया प्रमुख जिल्ला अधिकारी नारायणप्रसाद भट्टं यक्व सम्भावना दथुइ नं लिकुनाच्वंगु ख्वपया पर्यटन विकासया निंतिं बहुआयामिक क्षेत्रयात दुथ्याकाः गुरुयोजना दयेकाः प्रवद्र्धन यायेमाःगु खँय् बः बियादिल ।
होटल व्यवसायी गोकुल लामिछानें पूर्वाधार अभाव, सतक यातायातया बांमलाःगु अवस्थां पर्यटक म्हो जूगु खँ धयादिल । होटल मेरिगोल्डया प्रबन्ध निर्देशक जुयाच्वनादीम्ह लामिछानें वंगु खुदँ न्ह्यवनिसें पर्यटक वनीगु लँ लथालिङ्ग अवस्थाय् लानाच्वंगु, त्वनेगु लः, धः निकास थेंज्याःगु समस्या चुनौतिपूर्ण जुयाच्वंगु खँ कनादिल ।
नगरकोटाय् जक तःधंगु चीधंगु यानाः न्यय्गुलिं मल्याक होटल संचालनय् वयाच्वंगु दु । आन्तरिक पर्यटकतय्सं धाने यानाच्वंगु नगरकोटय् विदेशीया आकर्षत अप्वया वनाच्वंगु दु । दँय् ३० हजारया ल्याखय् विदेशी पर्यटक थन थ्यनाच्वंगु दु ।
गैरसरकारी संस्था महासंघया अध्यक्ष जितराम लामां ख्वपया पर्यटनयात विश्व बजारय् थ्यंकेत सूर्यविनायकय् खुल्ला चिडियाखाना, नगरकोटय् भ्यु टावर थेंज्याःगु पूर्वाधारया ज्यायात सरोकारवाला निकायं तुरुन्त न्ह्याकेमाःगु खँय् बः बियादिल ।
LEAVE YOUR COMMENTS