ओलीयात प्रचण्डया हाथ्या

येँ – नेकपा माओवादी केन्द्रया अध्यक्ष पुष्पकमल दाहालं एमालेया अध्यक्ष केपी शर्मा ओलीं पुलांम्ह जुजु ज्ञानेन्द्रलिसे प्रचण्डं न्यागू बुँदै सम्झौता याःगु दावी प्रमाणित यायेत हाथ्या बियादीगु दु । लिसें वय्कलं ओलीयात ‘झुट, बेइमानी व धोका’या मेगु नां जूगु टिप्पणी यानादीगु दु ।

एमालेया मनोनित केन्द्रीय दुजःपिनिगु सपथ ग्रहण याकेगु ज्याझ्वलय् बुधवाः पुलांम्ह प्रधानमन्त्री लिसें एमालेया अध्यक्ष ओलीं तत्कालीन जुजु ज्ञानेन्द्र व माओवादी अध्यक्ष दथुइ २०६० साल मंसिर १८ गते न्यागू बुँदे सहमति जूगु दावी याःगु खः ।

उगु दावीया खण्डन यासें दाहालं म्हिगः छगू प्रेस विज्ञप्ति पिथनाः धाःगु दु ‘दलाल पुँजीपति वर्ग व प्रतिगमनया राजनैतिक प्रतिनिधिया रुपय् खनेदुम्ह एमाले गुटया अध्यक्ष केपी शर्मा ओली झुट, बेइमान, व धोकाया मेगु नां खः धइगु तथ्ययात वय्कःया नकतिनिया अभिव्यक्तिं हाकनं प्रमाणित याःगु दु, पुलांम्ह जुजु ज्ञानेन्द्र शाहलिसे प्रचण्डया न्यागू बुँदे सहमति जूगु खः धयागु खँ शतप्रतिशत झुट प्रचार यानाः थःगु राजनीतिक दरिद्र चरित्र क्यंगु दु ।’

दाहालं आलीं थःगु धापु प्रमाणित यायेमफुत धाःसा जनतायाके माफी फ्वने माःगु धासें धयादीगु दु ‘जिं केपी ओलीयात न्यागू बुँदे सहमति प्रमाणित यायेत व यदि प्रमाणित यायेमफुत धाःसा मखुगु खँ ल्हानागु खः धकाः जनतायाके माफी फ्वनेत नं हाथ्या बियाच्वना ।’

सम्बन्धित बुखँ

LEAVE YOUR COMMENTS