ससफो सरकारय् वनीगु अनिश्चित

येँ – संघीय समाजवादी फोरम नेपाल सरकारय् वनीगु खँ अनिश्चित जूवंगु दु । नेकपा (एमाले) व नेकपा (माओवादी) केन्द्रया दथुइ पार्टी एकताया खँ मिले मजूगुलिं यानाः ससफो नं सरकारय् वनीगु खँ ध्याकुनय् लाःवंगु दु ।

ससफोयात सरकार गठन याःगु इलय् सरकारय् दुहां वयेत प्रधानमन्त्री खड्गप्रसाद शर्मा ओलीं इनाप याःगु खःसा ससफों धाःसा थःपिनिगु मागयात कयाः सम्बोधन मजूतले सरकारय् वयेमखु धकाः लिसः बियाच्वंगु खः ।

ससफों वर्तमान संविधान संशोधन जुइमाःगु माग याना वयाच्वंगु खःसा माग प्रति थःपिं सकारात्मक जूगु खँ प्रधानमन्त्री ओलीं धायेगु याना वयाच्वंगु खः । उगु इलय् ससफों थःपिनिगु माग बारे सहमति पत्रय् हस्ताक्षर यानाः जक सरकारय् वयेगु अडान काःगु खः । तर आः धाःसा सरकार वनेगु वा मवनेगु विषयय् सरकारं ससफो लिसे गुगुं नं कथंया सहलह वा स्वापू तयेगु ज्या यानाच्वंगु मदु ।

ससफो सरकारय् वनी वा वनीमखु धइगु खँ आः माओवादी व एमालेया दथुइ वैशाख ९ गते जुइधाःगु एकता प्रक्रियां जक क्वःदी फइगु खँ धाःगु दु ।