काठमाडौं मेरिएट होटल संचालनय्
येँ – अन्तर्राष्ट्रिय रुपं लोकंह्वाःगु होटल ब्राण्ड मेरिएटया नामं येँया नक्सालय् चायेकूगु फाइभस्टार हाेटल ‘काठमाडौं मेरिएट होटल’ संचालनय् वःगु दु । थुकिया लिसें नेपालय् मेरिएट होटलया फ्ल्यागसीप ब्राण्डया डेब्यु नं जूगु दु ।
होटलया शुभारम्भ ज्याझ्वलय् न्ववासें मेरिएट इन्टरनेशनलया दक्ष्णि एशियाया एरिया भाइस प्रेसिडेन्ट निराज गोभिलं मेरिएटया फ्ल्यागसीप ब्राण्ड सुन्दर देय् नेपालय् हयेदयाः थःपिं तसकंलय्ताःगु खँ धयादीगु दु । थ्व झ्वलय् वय्कलं सन् २०१८ य् जक नेपालय् झिगू लाख पर्यटक दुहां वःगु व थ्व रेकर्डं देशय् पर्यटनया सम्भावना बल्लाःगु खनेदु धयासें थःपिनिगु होटलय् स्वनिगलय् पाहाँयापिंत उत्कृष्ट बसोबासया लिसें अतिथिया स्वभाव कथं सांस्कृतिक अनुभवत प्रदान याइगु खँ धयादिल ।
‘व्यावसायिक यात्रुत व फुर्सद दुपिं यात्रीतय् निंतिं नेपालय् अजूचायापुगु अनुभव प्रदान यायेत यक्व हे विश्व सम्पदा क्षेत्रत दु, गुकी पर्यटकतय्सं सोफेस्टिकेटेड स्पेस व मेरिएटया लुमुगु आतिथ्यया आनन्द कायेफइ’ वय्कलं धयादीगु दु ।
मेरिएट ब्राण्ड विश्वन्यंकं हे लोकंह्वाःगु होटल ब्राण्ड खः । मेरिएटं ६५ गू थीथी देशय् न्यासलं मल्याक होटल व रिजोर्ट संचालन यानाच्वंगु दु ।
LEAVE YOUR COMMENTS