पेट्रोलया भाः अझं कुहां वइ मखुनि

येँ (नेपालभाषा टाइम्स)- भारतीय आयल कर्पोरेशन (ओआईसीं) पेट्रोलियम पदार्थया भाः क्वकयाः छ्वया हःसां नं नेपाल आयल निगमं अझ नं पेट्रोलियम पदार्थया भाः क्वमकायेगु खँ लिसा कयाः धाःगु दु । निगमं भारतीय आयल निगमयात पुलेमानिगु बक्यौता २३ अर्ब व सरकार व थीथी वाणिज्य बैंकयात पुलेमाःगु त्यासा १० अर्ब ल्यं दनि धासें तत्काल भाः क्वकायेगु सम्भावना मदुगु खँ धाःगु दु ।

म्हिगः निगमं छगू पत्रकार सम्मेलन यासें निगमया कार्यकारी निर्देशक उमेशप्रसाद थानीं निगम आर्थिक रुपं सवल जुया वल धाःसा जक भाः क्वकाये फइगु खँ स्पष्ट यानादीगु खः । वय्कलं आः नं निगमयात ६२ करोड तका घाटा जुयाच्वंगु खँ धयादीगु दु ।

भारतीय आयल कर्पोरेशनं म्हिगः छ्वयाहःगु भाः कथं पेट्रोलय् प्रतिलिटर ४ तका ७४ पैसा लबः दुसां डिजेलय् ४ तका ५० पैसा व जा थुइगु ग्यासय् ४९९ तका ५७ पैसा द्यापं लानाच्वंगु दुगु खँ नं कार्यकारी निर्देशक थानीं कनादिल । थ्व स्वयां न्ह्यः नं निक्वः तक भाः क्वकयाः भारतीय आयल कर्पोरेशनं भाः छ्वया हयेधुंकूगु दु ।