केन्द्रीय बैंकं बजारं ३ अर्ब तका ध्यबा साला काल
येँ – वाणिज्य बैंकतय्स लगानी यायेत पूँजी मदुगु धासें निक्षेपया ब्याजदर थकायाच्वंगु इलय् केन्द्रीय बैंकं धाःसा अप्वः तरलता दुगु धासें बजारं ३ अर्ब तका ध्यबा साला काःगु दु । मंगलवाः व बुधवाः नेपाल राष्ट्र बैंकं उपकरणपाखें थीथी च्यागू बैंकं ७ अर्ब ३० करोड तका ध्यबा साला काःगु खः ।
अन्तर बैंक ब्याजदर ३ प्रतिशत स्वयां अप्वः कुहां वंगुलिं राष्ट्र बैंक उगु ध्यबा साला काःगु खः । बैकिङ प्रणालीइ अधिक तरलता दु धाःसां नं बैंकया ब्याजदर धाःसा कुहां वःगु मदुनि । राष्ट्र बैंकयाकथं अधिक तरलता दत धाःसा अन्तर बैंक ब्याजदर म्हो जुइगु व तरलता म्हो जुल धाःसा अन्तर बैंकिङ ब्याजदर अप्वइगु खः ।
राष्ट्र बैंकं ७ अर्ब तका ध्यबा बजारं साला कायेधुंकाः नं बजारय् अझं ३६ अर्ब स्वयां अप्वः तरलता दुगु राष्ट्र बैंकं धाःगु दु । ब्याजदर करिडोरकथं अन्तर बैंक ब्याजदर ५ प्रतिशत स्वयां अप्वः जुल धाःसा राष्ट्र बैंकं बजारय् ध्यबा छ्वयेगु याइसा ३ प्रतिशत स्वयां म्हो जुल धाःसा बजारं ध्यबा साला कायेगु याइ ।
राष्ट्र बैंकया कथं छुं बैंकयात तरलता सहज जुयाच्वंगु दुसा आपालं धयाथें बैंकय् तरलताया समस्या जुयाच्वंगु दु । तरलता सहज मजुयाः बैंकतय्सं १२ प्रतिशत स्वयां अप्वः ब्याज पुलाः निक्षेप कायेगु यानाच्वंगु दु ।
LEAVE YOUR COMMENTS