मंकाः खलःपाखें सुभाय्

येँ – येँ महानगरपालिकां नेपालभाषा मंकाः खलःया दबूछेँ दनेत थुगु आर्थिक दँय् ५ करोड २५ लाख तका बीगु धकाः बजेट विनियोजन याःगु खँय् मंकाः खलकं लसता प्वंकूगु दु । मंकाः खलःया नायः लिसें जनकवि दुर्गालाल श्रेष्ठं थन छगू वक्तव्य पित बिसें थुकिया लागिं येँ मनपाया मेयर विद्यासुन्दर शाक्य लगायत नगरसभाया सकल दुजःपिंत सुभाय् देछानादीगु दु ।

दबूछेँ निर्माणया लागिं मंकाः खलः थःपिंसं हे न्याना तःगु व झी कवि चित्तधर हृदयं दान बियादीगु समेत यानाः येँया १५ वडा बिज्यासलय् १ रोपनी १२ आना २ पैसा जग्गा दु । आः मनपापाखें बीगु थुगु ग्वाहालिपाखें अन दबूछेँ निर्माण यायेगु खँ वक्तव्यय् धयातःगु दु ।

वक्तव्यय् येँ मनपापाखें प्राप्त जुइगु छुं नं कथंया अनुदानया पूर्ण पारदर्शी कथं सदुपयोग जुइगु बचं बिसें थुगु ग्वाहालिपाखें सकल नेवाःतय् मंकाःआज्जु जुयाच्वंगु दबूछेँ निर्माणया म्हगस पूवनीगु विश्वास नं प्वंकातःगु दु ।

थ्वहे झ्वलय् मंकाः खलःया तःमुँज्या यायेगु लिसें येँ मनपापाखें चूलाइगु थ्व ग्वाहालियात याकनं ज्याय् छ्यलेगु बारे सहलह यायेत शुक्रवाः मंकाः खलःया मुँज्या च्वनेत्यंगु खँ सीदुगु दु । ताः ई तक निष्क्रिय जुयाच्वंगु मंकाः खलः छुं ई न्ह्यः विधिवत् रुपं दर्ता यानाः हानं न्ह्याकूगु खः ।