‘दिल्लीइ सम्झौता याये दइ मखु’

येँ (नेपालभाषा टाइम्स) – नागरिक समाजया न्ह्यलुवापिंसं परराष्ट्रमन्त्रीया भारत भ्रमणय् दीर्घकालीन महत्वया विषयस छुं सम्झौता मयायेत इनाप याःगु दु। नेपाल-भारत मंकाः आयोगया बैठक थनिंनिसें न्हू दिल्लीइ शुरु जुइत्यंगु दु । उकिया निंतिं परराष्ट्रमन्त्री प्रदीप ज्ञवाली थौं हे भारत वनेत्यंगु दु ।

म्हिगः अख्तियारया पुलांम्ह प्रमुख आयुक्त सूर्यनाथ उपाध्याय, पुलांपिं राजदूतपिं लीलामणि पौडेल व हिरण्यलाल श्रेष्ठपिंसं मंकाः वक्तव्य जारी यासें निगू पक्षीय वार्ताय् बः बीत इनाप याःगु खः । वक्तव्यय् धयातःगु दु, ‘सीमा विवाद लगायतया कारणं ख्वाउँया वंगु सम्बन्धयात पारस्परिक विश्वास व समानताया आधारय् हाकनं क्वातुकुसें थवंथवय् स्वीकार्य, सम्मानजनक व सार्थक निष्कर्ष पिकायेगु सन्दर्भय् राजनीतिक तहलय् दुहां वंगु आःया निगू पक्षीय वार्तायात निरपेक्ष ढंगं नकारे याये फइ मखु ।’

लिसें वक्तव्यय् देय्या राजनैतिक अवस्था तरल जुयाच्वंगुलिं थ्वहे मौकाय् एकपक्षीय वा असमान लाभ कायेगु निंतिं बाह्य पक्ष सक्रिय जुयाच्वंगु दृष्टान्त दुगुलिं दीर्घकालीन महत्वया गुगुं नं विषयय् सहमति वा सम्झौता मयायेत इनाप यानातःगु दु ।