संघीयता ध्वस्त यायेत्यंगु द्वपं

प्रहरी विधेयकयात सत्तारुढ सांसदपाखें हे विरोध

येँ – सत्तारुढ नेपाल कम्युनिष्ट पार्टी (नेकपा) या सांसदतय्सं संविधान व संघीयताया मर्म अःखः ‘नेपाल प्रहरी व प्रदेश प्रहरी कार्य सञ्चालन सुपरीक्षण व समन्वय विधेयक’ हःगु धासें विरोध याःगु दु ।मंगलवाः संसदय् उगु विधेयकयात कयाः न्ह्याःगु सहलहय् सांसद जर्नादन शर्मा, नवराज सिलवाल, रेखा शर्मा, प्रदीप यादवपिंसं उकिया आलोचना याःगु खः ।

अथेहे हे प्रमुख प्रतिपक्षी कांग्रेसया अमरेशकुमार सिंह व भरतकुमार साहपिंसं नं संविधान अःखः विधेयक वःगु धासें विरोध याःगु दु ।
पुलांम्ह गृहमन्त्री लिसें सांसद शर्मां विधेयक हुबहू पास जुल धाःसा संघ व प्रदेशया प्रहरी दथुइ थप द्वन्द्व ब्वलनीगु ख्याच्वः बियादीगु दु ।

वय्कलं संविधानया अःखः विधेयक दयेकूगु धासें संविधानया धारा २३२ या उपधारा १ स ‘संघ, प्रदेश व स्थानीय तहया सम्बन्ध सहकार्य, सहअस्तित्व व समन्वयया सिद्धान्त’ जुइ धकाः न्ह्यथनातःगु दुसां उकिया मर्म व भावनाया अःखः विधेयक वःगु दुर्भाग्यपूर्ण दु धयादिल ।
वय्कलं संघं अभिभावकत्व यायेगु पलेसा प्रदेश व स्थानीय तहयात छगू कार्यान्वयन इकाई दयेकेत्यंगु द्वपं नं बियादिल ।

सांसद रेखा शर्मां थःपिं संघीयताया निंतिं ल्वाना वयापिं जूगुलिं सरकारं आः पेश याःगु विधेयकयात स्वीकार याये फइमखु धयादिल ।
थःगु हे पार्टीया सांसदतय्सं विधेयकयात आलोचना यानाच्वंगु इलय् गृहमन्त्री रामबहादुर थापा धाःसा ख्वाः खिउँकाः संसदय् च्वनाच्वंगु खः ।

सांसद शर्मां ‘संविधानया धारा २६८ या उपधारा २ स प्रत्येक प्रदेशय् प्रहरी संगठन दइ धकाः न्ह्यथनातःगु खँ कनादिसें संविधानय् स्पष्ट न्ह्यथनातःगु खँया अःखः बिस्कं कथं विधेयक वःगु दावी यानादिल । प्रदेश प्रहरी प्रदेश सरकार प्रति पूर्ण जवाफदेही जुइमाः धासें विधेयकय् प्रदेशया अधिकार संकुचन याःगु खँ नं वय्कलं कनादिल ।

संविधान व संघीयताया अःखः केन्द्रिकृत प्रशासनयात न्ह्यःने न्ह्याकेगु कथं विधेयक वःगु द्वपं नं वय्कलं बियादिल । वय्कलं न्ह्यःने धयादी, ‘प्रदेश सरकारयात निकम्मा दयेकेगु कथं प्रदेश सरकार स्वयां च्वय् सीडीओयात तयाः अधिकार बिउगु दु, सीडीओ गुकथं प्रदेश सरकार स्वयां च्वय् जुइ ?’

अथेहे ससफोया सांसद प्रदीप यादवं मुख्यमन्त्रीयात दास व सीडीओयात जुजु दयेकेगु कथं विधेयक वःगु टिप्पणी यानादिल । वय्कलं धयादी, ‘संघीयतां मुख्यमन्त्रीयात बल्लाकेत्यंगु खः, दास दयेकेत्यंगु मखु ।’

सहलह ज्याझ्वलय् न्ववाःपिं नेकपाया आपालं सांसदतय्सं सीडीओया अधिकारयात कयाः आलोचना याःगु दु । नेकपाया हे सांसद नवराज सिलवालं प्रदेश प्रहरीया भर्ना व बढुवाया अधिकार प्रदेशयात बीमाःगु खँ कनादिल । वय्कलं डीएसपी स्वयां च्वय्या फुक्कं दर्जा च्वं नियुक्ति यायेगु ढंगं विधेयक वःगु धासें उकियात कयाः विरोध यानादिल ।

 

 

सम्बन्धित बुखँ

LEAVE YOUR COMMENTS