भाषा, साहित्य, संगीतया श्रृवृद्धिया निंतिं प्रतिष्ठान

येँ(नेपालभाषा टाइम्स)- नेपाःया संस्कृति, नेपालभाषाया साहित्यया श्रीवृद्धिलिसें संगीत व पत्रकारिता ख्यलय् समर्पित जुयाच्वंपिंत प्रोत्साहन बीगु ल्याखं गणेशदेवी स्मृति प्रतिष्ठान गठन याःगु दु । येँ महानगरपालिका १३ वडाया समाजसेवी दिलबहादुर मानन्धरया जहान मदुम्ह गणेशदेवी मानन्धरया नामं उगु प्रतिष्ठान गठन याःगु खः ।

समाजसेवी मानन्धरया जहानया लुमन्तिइ वय्कःया कायपिं प्रा. डा. राजु मानन्धर (अस्टे«लिया), राजु मानन्धर, राजेश मानन्धर, सज्जु मानन्धर व छेँजःपिनिगु इनापकथं उगु प्रतिष्ठान चायेकूगु खः । छुं दिं न्ह्यः जूगु छगू मुँज्यां १३ वडाया स्थानीय समाजसेवी विजयकुमार मानन्धरया अध्यक्षताय् झिंस्वम्हेसिया प्रतिष्ठान गठन याःगु खः । प्रतिष्ठानय् थीथी ख्यःपाखें प्रतिनिधित्व जुइकथं ज्यासना पुचःयात पूर्णता बिउगु दु ।

सांस्कृतिक, सांगीतिक, साहित्यिक ख्यलय् विशिष्ट योगदान बियादीपिं स्रष्टालिसें पत्रकारिता ख्यलय् क्रियाशील जुयाच्वनादीपिंत वय्कःपिनिगु योगदानयात स्वतन्त्र रुपं मूल्यांकन यानाः सम्मान यायेगु उद्देश्य प्रतिष्ठानया जूगु जानकारी बिउगु दु । नेपालभाषाया साहित्य व संगीतयात अन्तर्राष्ट्रियस्तरय् समृद्ध यायेगु निंतिं प्रतिष्ठानं थःगु थासं भूमिका म्हितेगु व देश विदेश च्वनाच्वंपिं प्रतिभावानपिंत मालाः सम्मान यायेगु योजना दुगु प्रतिष्ठानया अध्यक्ष मानन्धरं कनादिल ।

प्रतिष्ठानया ज्यासना पुचःलिसें नांजाःम्ह निर्देशक, च्वमिलिसें कलाकार पवन जोशीया संयोजकत्वय् छगू परामर्श समिति नं गठन याःगु दु । समितिं याःगु सिफारिसया लिधंसाय् स्रष्टा व विधा ल्ययाः सम्मान यायेगु प्रतिष्ठानं जानकारी बिउगु दु ।