निर्मलाया मामं बयान हिल !

निर्मला पन्त प्रकरणय् न्हूगु ट्विस्ट –

येँ – नेपाःया अपराध ख्यलय् दकलय् ज्यंके मफुगु मुद्दा जुयाः चर्चाय् वयाच्वंगु निर्मला पन्तया बलात्कार लिपा हत्या सम्बन्धी प्रकरणय् निर्मलाया मां दुर्गादेवी पन्तं थःगु पुलांगु बयान हिउगु दु । वय्कःया थ्व बयान हिलेगु ज्याया नापनापं निर्मला प्रकरणय् न्हूगु ‘ट्विस्ट’ वःगु टिप्पणी नं याना हःगु दु ।

नांजाःगु अनलाइन पत्रिका ‘अन– लाइन खबर’ लिसे खँ ल्हायेगु झ्वलय् दुर्गादेवी पन्तं थःगु पुलांगु धापूयात हिलाः थः म्ह्याय् निर्मलायात स्याःम्ह मनू कञ्चनपुरय् हे च्वंम्ह दिलीपसिंह बिष्ट जुइमाः धकाः बिचाः तयादीगु खँ पिहां वःगु दु । लुमंकेबहः जू, दिलीपसिंह बिष्टयात प्रहरीं शुरुइ हे निर्मलायात स्याःम्ह धकाः ज्वंगु खःसा बिष्टं प्रहरी हिरासतय् निर्मलायात थम्हं स्यानागु खः धकाः साबिती बयान समेत बिउगु खः ।

तर स्थानीय मानव अधिकारकर्मीतय्सं दिलीपसिंह बिष्ट मानसिक सन्तुलन स्यंम्ह मनू जूगुलिं प्रहरीं धाथेंयाम्ह अपराधी बचे यायेत वयात ज्वनाः फँसे याःगु खः धासें विरोध याना हल । वयां लिपा वयागु डीएनए नं मिले मजू धइगु रिपोर्ट वयेवं प्रहरीं वयात त्वःता छ्वःगु खः ।

निर्मलाया मां दुर्गादेवीं दिलीपसिंह मुख्यम्ह अपराधी मखु धकाः सकस्यां धाःगुलिं अबले थम्हं नं खः हे धकाः न्ववानागु व प्रहरीं धाःगु खँ स्वीकार याये मते धकाः थःत निर्मलायात न्याय माल धकाः आन्दोलन यानाच्वंपिं आन्दोलनकारी व मानव अधिकारकर्मीतय्सं दबाब बिउगुलिं थः सुम्क च्वनागु खः धयादीगु खँ नं समाचारय् धयातःगु दु ।

दिलीपसिंहयात ज्वनाः यातना बिल धइगु द्वपं बियाः एसपी डिल्लीराज बिष्ट लगायत च्याम्ह प्रहरी विरुद्ध दुर्गादेवीं मुद्दा तःगु खः । म्हिगः तिनि अदालतं थुकी प्रमाण मगाः धासें थ्व च्याम्ह मध्ये खुम्हेसित धरौटी कयाः त्वःतेत आदेश बिउगु दु । दिलीपसिंह बिष्टं प्रहरी हिरासतय् बिउगु बयानया भिडियो स्वयाबलय् धाथेंयाम्ह अपराधी वहे खः थें च्वना वःगु व थौंकन्हय् दिलीपसिंह थःगु छेँया जःखः चाःहिउ वयाच्वंगुलिं थः झन् ग्यानाच्वनागु खँ नं कनादीगु दु ।

दुर्गादेवीं उकुन्हु तक निर्मला मदुगु खँय् सरकारं बी धाःगु क्षतिपूर्ति नं मकाःगु खःसा आः क्षतिपूर्तिया लागिं निवेदन नं बिउगु दु । सरकारं पन्तयात १८ लाख तका दां बी धाःगु खः । दुर्गादेवीं बयान हिलाः न्ववाःगुलिं थ्व मुद्दां मेगु मोड काइगु अनुमान याना हःगु दु ।

सम्बन्धित बुखँ

LEAVE YOUR COMMENTS