नेपाःया जनसंख्या निगू करोड चय्खुगू लाख

नेपाःया कुल जनसंख्या २ गू करोड ८६ गू लाख २३ हजार १७८ थ्यंगु दु । थ्व वंगु असार २६ गतेतकया दुनेया तथ्यांक खः । सन् १९९४ य् जुलाई ११ य् नेपाःया कुल जनसंख्या २ गू करोड १० गू लाख ५५ हजार ५६६ थ्यंगुलिइ थ्व वंगु नीन्यादँया दुने नेपाःया कुल जनसंख्याय् ८० गू लाख थप जूगु दु ।

उगु इलय् जनसंख्या वृद्धिदर २ दशमलव ६८ प्रतिशत दुगुलिइ आः उगु संख्या १ दशमलव ८ प्रतिशत दु । जनसंख्या व्यवस्थापनय् नेपाःया प्रगति उल्लेखनीय जूगु माने याःसां नं उगु वृद्धिदरयात धाःसा अप्वः हे जूगु कथं कयातःगु दु । नेपालं सन् १९९४ लय् इजिप्टया राजधानी कायरोय् जूगु जनसंख्या व विकास सम्बन्धी अन्तर्राष्ट्रिय सम्मेलनय् (आईसीपीडीइ) ब्वति काःगु इलय् प्रतिवद्धता प्वंकूगु नं २५ दँ थ्यंगु दु ।

उगु सम्मेलनं विशेषतः यौन व प्रजनन स्वास्थ्ययात अधिकारया रुपय् स्थापित याकेत कोशल्वहंया रुपय् ज्या याःगु खः ।स्वास्थ्य तथा जनसंख्या मन्त्रालय, संयुक्त राष्ट्र संघीय जनसंख्या कोष (युएनएफपीए) व नेपाल परिवार नियोजन संघपाखें मंकाःकथं विश्व जनसङ्ख्या दिवसया लसताय् थन ग्वसाः ग्वःगु ज्याझ्वलय् वंगु नीन्यादँया दुने जनसंख्या व्यवस्थापन, मातृशिशु, स्वास्थ्य, परिवार नियोजन, यौन व प्रजनन अधिकारया क्षेत्रय् उल्लेखनीय रुपय् हिउपाः वःगु जानकारी बिउगु खः ।

लिपांगु दँय नेपालं प्रसूतिजन्य मृत्यु दरय् म्होति हयेत, तालिम प्राप्त स्वास्थ्यकर्मिपाखें प्रसूति याकेत, प्रजनन दर, परिवार नियोजनया साधनया पहुँच व उपलब्धताया ख्यलय् सुधार याःगु दु, तर उगु क्षेत्रय् वंगु निदँ थुखे सूचकांकय् उल्लेखनीय सुधार जूगु धाःसा खने दयाच्वंगु मदु ।

आईसीपीडीइ ल्हाःचिं तयेधुंकाः नेपालं सुरक्षित मातृत्व रणनीति, प्रजनन स्वास्थ्य रणनीति, सुरक्षित गर्भपतनयात कानूनी मान्यता बीगुया नापं घरेलु हिंसा विरुद्ध ऐन, लैंगिक समानता ऐन, छाउपडी विरुद्धया ऐन, सुरक्षित मातृत्व व प्रजनन स्वास्थ्य अधिकार ऐन थेंज्याःगु महत्वपूर्ण नीतिगत व्यवस्था याःसां नं नेपाः अझ नं बालविवाह जुइगु देशय् लानाच्वंगु दु ।

स्वास्थ्य मन्त्रालयया तथ्यांककथं ३७ प्रतिशत मिसामस्तय् इहिपा १८ दँ मदुनिगु इलय् जुइगु यानाच्वंगु दु । १५ निसें १८ दँ तकया उमेर समूहया प्यब्वय् छब्व मिसां इच्छा याःसां नं परिवार नियोजनया साधन प्राप्त याये फयाच्वंगु मदु । आईसीपीडीया थ्व नीन्यादँया यात्रा ः जनसंख्या व विकासय् प्रतिवद्धता धइगु विषययात प्राथमिकता बियातःगु दु ।

उपप्रधानलिसें स्वास्थ्य व जनसंख्यामन्त्री उपेन्द्र यादवं जन्मदर क्वपालेवं जक जनसंख्या व्यवस्था जुइमखु धासें पालिका व प्रदेशय् स्वास्थ्य व शिक्षाया दक्वं पूर्वाधार दयेकेमाःगु आवश्यक जूगु खँय् बः बियादिल । वय्कलं धयादिल, ‘गामं सहरय् कुहां वयेगु प्रवृत्ति अप्वयाच्वंगु दु, तर सहर सहर थें जुयाच्वंगु मदु ।

गामय् हे दक्वं पूर्वाधार थ्यंके फत धाःसा जक बसाइँसराइ म्हो जुइफु । राजधानी केन्द्रीत मानसिकता त्वःतेमाःगु हथाय् जुइधुंकूगु दु ।’ मन्त्रालयय् स्वास्थ्य क्षेत्रं दकलय् अप्वः प्राथमिकता कयाच्वंगु चर्चा यानादिसें उपप्रधानमन्त्री यादवं जनसंख्यायात प्राथमिकताय् तयेमाःगु अति आवश्यक जूगु धयादिल ।

युएनएफपीएया देशीय प्रतिनिधि लुब्ना बाकिं आईसीपीडीया प्रतिवद्धता कार्यान्वयनय् नेपालं उल्लेखनीय रुपं याःगु प्रगतियात कयाः च्वछासें वइगु दिनय् जनसंख्या व्यवस्थापन, मातृशिशु स्वास्थ्य, परिवार नियोजन, यौन तथा प्रजनन अधिकारया क्षेत्रय् ज्या याये ल्यं दुगु चर्चा यानादिल ।

नेपाल परिवार नियोजन संघया कार्यकारी निर्देशक केपी विष्टं बृहत्तर यौनिकता शिक्षा, परिवार नियोजन, सुरक्षित गर्भपतन सेवाया पहुँचय् थप लगानीया आवश्यकता जूगु धासें थुपिं क्षेत्रया निंतिं याइगु लगानीं दिगो विकासया लक्ष्य हासिल यायेत ग्वाहालि जू वनीगु विश्वास प्वंकादिल ।

स्वास्थ्य तथा जनसंख्या मन्त्रालयया सहसचिव मधुसूदन बुर्लाकोटीं जनसंख्या व्यवस्थापनय् दीर्घकालीन योजना कार्यान्वयनय् वःगु जानकारी बियादिसें वंगु नीन्यादँया दुने उल्लेखनीय सुधार वःगु दु धयादिल । उगु इलय् युएनएफपीएपाखें तयार याःगु जनसंख्या व प्रजनन स्वास्थ्यसम्बन्धी वृत्तचित्रया नं प्रदर्शनी याःगु खः ।

सम्बन्धित बुखँ

LEAVE YOUR COMMENTS