आख्यानकार साय्मिया याकः बाखं वाचन

यल – सः छगू फरक अभिव्यक्तिया ग्वसालय् नेपालभाषाया नांजाःम्ह आख्यानकार मथुरा साय्मिया याकः बाखं वाचन ज्याझ्वः जुल । संस्थाया ग्वसालय् जूगु थ्व स्वंगूगु संस्करणया साहित्यिक ज्याझ्वः खः । इखालखुस्थित दबू नेवाः नसा छेँय् जूगु ज्याझ्वलय् आख्यानकार साय्मिं थःगु थीथी सन्दर्भ व परिस्थितियात कयाः च्वयादीगु बाखं ब्वनाः न्यंकादीगु खः ।

वय्कलं सरकारं विकासया नामय् विनाश यायेकथं स्वनिगःया स्थानीय व सम्पदास्थल लाक्वपाक्व धंगं डोजर चले यानाः आतंक न्यंकूगु विषय, बाध्यात्मक कुसंस्कारं जायाच्वंगु समाज, मतिना सम्बन्धी च्वयादीगु इन्क्लाब, संस्कर, गुथि, घाः, प्रेम परीक्षा, ला नःम्ह बुद्ध, भुल नांया बाखं ब्वनाः न्यंकादीगु खः ।

संस्थाया नायः सुधीर ख्वबिया अध्यक्षताय् जूगु ज्याझ्वलय् ज्ञानीराजा मानन्धरया ‘मतिनाया सवाः’ नांया चिबाखं मुना सफूया नं पितब्वज्या याःगु खः । उगु सफू आख्यानकार साय्मि, नरेश अमात्य व संस्थाया नायः ख्वबिं मंकाःकथं पितब्वज्या यानादीगु खः । ज्याझ्वलय् ब्वति काःपिं मध्ये छम्हेसित बीगु मतिनाया चिं भाजु साय्मिं राज अक्ष्योभ्ययात लःल्हानादीगु खःसा संस्थापाखें नायः ख्वबिं साय्मियात मतिनाया चिं लःल्हानादीगु खः ।

 

 

सम्बन्धित बुखँ

LEAVE YOUR COMMENTS