न्युरोडया लँ चिब्या याःगु विरोधय् प्रदर्शन
येँ (नेपालभाषा टाइम्स)÷ न्हू सतक (न्युरोड)या लँ चिब्या यायेत्यंगु विरोधय् स्थानीयतय्सं आइतवाः प्रदर्शन याःगु दु । आइतवाः वाः वयाच्वंसां स्थानीयत सतकय् कुहां वयाः येँ महानगरपालिकाया विरोधय् नारा थ्वयेकूगु खः । न्हू सतक क्षेत्र लाःगु येँ महानगरपालिका २२ वडाया अध्यक्ष चिनिकाजी महर्जनया नेतृत्वय् स्थानीयत सतकय् कुहांवःगु खः । न्हूसतक ध्वाखाय् मुनाः प्रदर्शना याःपिं स्थानीतय्सं ‘न्हूसतक ल्यंकेनु, सतक चिब्या याये दइमखु, महानगरपालिका मूर्दावाद’ धकाः नारा थ्वयेकूगु खः ।
येँ महानगरपालिकां सतक चिब्या यायेगु निंतिं वंघलं निसें जुद्ध सालिक तकया लँ म्हुइगु नापं सुरु यायेधुंकूगु दु । छुं ई न्ह्यः न्हूसतकय् पार्किङ बन्द याकूगु महानगरपालिकां आः गाडी वनीगु लँ चिब्या यानाः फुटपाथ तब्या यायेगु धासें सतक म्हुइगु सुरु याःगु खः ।
स्थानीयतय्सं धाःसा सतक चिब्या यातकि गाडी जाम जुयाः झन् समस्या जुइ धासें सतक चिब्या यायेदइमखु धया वयाच्वंगु खः । येँ महानगरपालिकां न्हू सतक लागा लाःगु वडा २२ लिसे समन्वय तकं मयासें टेन्डर आह्वान यानाः फुटपाथ तब्या यायेगु निंतिं सतक म्हुइगु सुरु याःगु खः । येँ मनपा २२ वडाया अध्यक्ष चिनिकाजी महर्जनं सतक चिब्या यायेगु बारे मेयर बालेन साहं थःपिंत छुं जानकारी तकं मबिउगु खँ धाःगु दु ।
अध्यक्ष महर्जनं महानगरपालिकां स्थानीय जनप्रतिनिधितय्त तकं बेवास्ता यासें सतक म्हुइगु सुरु द्वपं बिसें महानगरपालिकाया नेतृत्व अधिनायकवाद पाखे न्ह्यानाच्वंगु खँ धाःगु दु । महर्जनं धाःगु दु, ‘छुं नं ज्या यायेत स्थानीय जनप्रतिनिधिलिसे खँ ब्याकाः समन्वय यायेमाः, तर न्हूसतकय् सतक म्हुधुंकाः तक नं जिपिं लिसे छसः तकं छुं धाःगु मदु । मेयर साह वडाअध्यक्ष हे म्वाः धयागु ल्याखं न्ह्याः वंगु दु ।’
न्हूसतकया जःखः लाःगु वडायापिंसं नं न्हूसतक चिब्या यायेत्यंगु खँय् विरोध प्वंकाच्वंगु दु । न्हूसतक गाडी वयेवनीगु छगू मू सतक जूगुलिं लँ चिब्या जुयाः गाडी जाम जुइवं लिक्कसं लाःगु वडाय् नं जाम जुइ धासें मेमेगु वडाया जनप्रतिनिधिपिंसं नं सतक चिब्या यायेमजिउगु खँ धाःगु दु ।
मेखे महानगरं सतक म्हूसां उकियात सडक विभागं धाःसा पनाबिउगु दु । न्यूसतकया सतक सडक डिभिजन कार्यालय काठमाडौं अन्तर्गत लाःगु सतक खः । थ्व सतकय् म्हुइत डिभिजन कार्यालयया अनुमति कायेमाः । येँ महानगरपालिकां धाःसां डिभिजन कार्यालयया स्वीकृत तकं मकासे सतक म्हुइगु सुरु याःगु खः ।
मेयर बालेन साहं शनिवाः सतक डिभिजन कार्यालयय् न्ह्यःने फोहर वायेयंकूगु नं थ्व विवादया कारणं खः धाःगु दु । मेयर साहं रिङरोड तब्या यायेगु ज्या लिबाकूगु कारणं अनं धू ब्वयाः येँया वातावरण हे स्यंकाच्वंगु धासें सतक डिभिजन कार्यालय येँया न्ह्यःने फोहर वायेयंकूगु खः । सतक डिभिजन कार्यालयं धाःसा येँ महानगरपालिकाया थ्व ज्या न्हूसतकया लँ चिब्या यायेगु ज्यायात पनागुलिं विषयान्तरण यायेत मेयर साहं थ्व स्टण्ट याःगु खँ धाःगु दु ।
डिभिजन कार्यालयं शनिवाः हे छगू वक्तव्य पिथँसें थःपिनिगु जिम्माय् लाःगु न्यूरोडया सतक अनुमति हे मकासे चिब्या यायेत्यंगुलिं उगु ज्या पनागु कारणं थःपिं लिसे सरोकार हे मदुगु विषययात कारण दयेकाः फोहर वायेहयेगु थेंज्याःगु व्यवहार याःगु कानुनी राज्यया उपहास जूगु खँ धाःगु खः ।
LEAVE YOUR COMMENTS