भिक्षु अश्वघोषया राजकीय सम्मानपूर्वक अन्त्येष्टि

येँ (नेपालभाषा टाइम्स)÷संघनायक भिक्षु अश्वघोष महास्थविरया अन्त्येष्टि म्हिगः ‘विशेष’ राजकीय सम्मानपूर्वक जुल ।
आइतवाः च्वंगु मन्त्रिपरिषदया आकस्मिक बैठकं बुद्ध धर्मको माध्यमं देशय् शान्ति स्थापना, लोकतन्त्र र लुम्बिनी विकासय् वसपोलं यानाबिज्याःगु योगदानया कदर यासें ‘विशेष’ राजकीय सम्मान बीगु निर्णय याःगु खः ।
संघाराम विहारय् तयातःगु वसपोलया पार्थिव शरीरय् अन्तिम श्रद्धाञ्जली प्वंकुसें प्रधानमन्त्री केपी शर्मा ओलीं नेपाःया राष्ट्रिय ध्वाँय् फायेकादीगु खः । प्रम ओली थः जहान राधिका शाक्य लिसें झाःगु खः ।
अन्त्येष्टिया इलय् नेपाली सेनाया टुकडीं वसपोलप्रति सलामी अर्पण याःगु खः । भिक्षु संघया परम्परा कथं वसपोलयात संघउपनायक भिक्षु ज्ञाणपूर्णिक महास्थविरं मि तयाबिज्याःगु खःसा वयां लिपा भिक्षुणीपिनिपाखें डा. अनोजा, उपासक व उपासिकापिनिपाखें प्रतिनिधिमूलक रुपं मि तयेगु ज्या जूगु खः । वयां लिपा ज्येष्ठता कथं भिक्षुपिंसं पालंपाः मि तःगु खः ।
मि तये न्ह्यः वसपोलप्रति श्रद्धाञ्जली व्यक्त यासें राष्ट्रपति विद्यादेवी भण्डारी व प्रधानमन्त्री केपी ओलीं छ्वया हःगु सन्देश ब्वनाः न्यंकूगु खः ।


भिक्षु अश्वघोष ९३ दँय् शुक्रवाः न्हिनय् मदुगु खः । वसपोलयात म्हिगः पुलांम्ह उपप्रम लिसें नेकपाका महासचिव बिष्णु पौडेल, पूर्व उपप्रम लिसें नेका नेता प्रकाशमान सिंह, उर्जा मन्त्री वर्षमान पुन, येँ मनपाया मेयर विद्यासुन्दर शाक्यलिसें थीथी सांसदपिंसं विहारय् झायाः अन्तिम श्रद्धाञ्जली प्वंकादीगु खः ।
थ्वहे झ्वलय् अखिल नेपाल भिक्षु महासंघपाखें महासचिव भिक्षु कोण्डन्यं छगू विज्ञप्ति पिकासें भिक्षु अश्वघोषया निधनं नेपाःया बुद्ध धर्म ख्यलय् अपुरणीय क्षति जूगु खँ धयाबिज्याःगु दु ।
पुलांम्ह जुजु ज्ञानेन्द्र शाहपाखें नं छगू सन्देश छ्वयाः वसपोल मदुगुली दुःख प्वंकादीगु दु ।

सम्बन्धित बुखँ

LEAVE YOUR COMMENTS