बैंकतय् मागय् राष्ट्र बैंक सकारात्मक

येँ – ततःधंगु बैंकतय्सं थःपिं मेगु बैंकतलिसे मर्जर जुइगु खःसा थ्व थ्व शर्त पूरा यायेमाः धकाः राष्ट्र बैंक समक्ष तःगु मागयात पूवंकेगु सवालय् राष्ट्र बैंक सकारात्मक जूगु खँ धाःगु दु । तःधंगु बैंकतय्सं मर्जरया लागिं राष्ट्र बैंक समक्ष ७ बुँदा दुगु लिखित प्रस्ताव हे तःगु खःसा राष्ट्र बैंकं नं अज्याःगु लिखित प्रस्तावयात तुरुन्त हे सम्बोधन यायेत्यंगु खँ धाःगु दु ।

तःधंगु बैंकतय्सं तःगु अज्याःगु शर्त मध्ये छगू शर्त छुं नं बैंकया प्रमुख कार्यकारी निर्देशक (सीईओ) छगू बैंक त्वःताः मेगु बैंकय् वनेत दथुइ खुला तक पीमाः धकाः थौंकन्हय् तयातःगु प्रावधान चीकेमाः धइगु नं दु । अथे हे बैंकतय्गु आयकरय् छुट बीमाःगु, उत्पादनमुलक क्षेत्रय् गुलि प्रतिशत लगानी यायेमाः धयातःगु खः उलि प्रतिशत लगानी मजूसां आःयात छक्वः छुट बीमाःगु आदि माग उकी दुथ्याःगु खँ धाःगु दु ।

राष्ट्र बैंकं धाःसा अन्तर्राष्ट्रिय मूल्य मान्यतायात घात मजुइ कथं उमिगु शर्त माने याये फइगु संकेत बिउगु खँ सूत्रं धाःगु दु । उकिं आः याकनं हे थुकियात कयाः सहलह ब्याकीगु खँ नं धाःगु दु । राष्ट्र बैंकं तःधंगु २८ गू बैंकतय्त मर्जरया लागिं आह्वान याःगु खःसा उकियात स्वीकार यासें १६ गू बैंकतय्सं थःपिनि आसयपत्र राष्ट्र बैंकयात लःल्हायेधुंकूगु दु ।

तर तःधंगु बैंकतय्सं धाःसा थःपिंसं बुझे यानागु मागपत्रय् राष्ट्र बैंकं गज्याःगु नीति ज्वनी धकाः उकियात हे पियाच्वंगु खँ धाःगु दु । राष्ट्र बैंकया लिसः वयेधुंकाः जक तःधंगु बैंकतय्सं मर्जर बारे बिचाः याइगु खँ धाःगु दु ।

सम्बन्धित बुखँ

LEAVE YOUR COMMENTS