किपुलिइ ऐतिहासिक झिंनिदां तं व फल्चाया उलेज्या
किपू- किपू नगरपालिका वडा नं. ३ समल त्वालय् च्वंगु ऐतिहासिक झिंनिदां तं व कुतिसाः त्वालय् च्वंगु फल्चा पुनःनिर्माण क्वचाःगु दु । पुनःनिर्माण क्वचाःगु झिंनिदां तं व फल्चाया वंगु वालय् उलेज्या याःगु खः ।
किपू नगरपालिकाया प्रमुख रमेश महर्जनं झिंनिदां तं व फल्चाया उलेज्या यानादीगु खः । फल्चा उलेज्या लिपा जूगु ज्याझ्वलय् नवासें मूपाहां नगर प्रमुख महर्जनं फल्चाय् च्वनाः उकियात जीवन्त याना तयेत व उकिया महत्व व गरिमा कायम याना तयेत इनाप यानादिल । लिसें फल्चाया सही सदुपयोग यायेगु ल्याखं लाज्याकथं छेँय् यायेमाःगु छुं नं ज्या दुसा फल्चाय् च्वनाः यायेत नं इनाप यासें थथे जुल धाःसा फल्चाया जीवन्तता कायम याये फइ धयादिल ।
उपप्रमुख सरस्वति खड्कां फल्चा उलेज्या यायेगु धइगु सम्पदात स्थानीय समुदाययात लmल्हायेगु खः धासें फल्चाया सौन्दर्यता ल्यंका तयेगु जिम्मा स्थानीय समुदायं कायेमाः धयादिल ।
किपू नगरपालिका वडा नं. १ या वडाअध्यक्ष हर्ष महर्जनं फल्चा वा मेगु छुं नं कथंया सम्पदा दयेकेगु जक मखु, उकियात माःकथं सुचुकुचु याना तयेगु व संरचनायात कायम नं याना तयेमाः धयादिल । झिंनिदां तं पुनःनिर्माण उपभोक्ता समितिया अध्यक्ष भाइलाल महर्जनं पुनःनिर्माणया इलय् थःपितं जूगु अनुभव कनादीगु खः ।
झिंनिदां तं किपू नगरपालिकाया आर्थिक ग्वाहालिं पुनःनिर्माण याःगु खःसा कुतिसाः त्वाःया फल्चा पुनःनिर्माणया निंतिं नेपाल सरकार अन्तर्गतया संस्कृति, पर्यटन तथा नागरिक उड्डयन मन्त्रालय, पुरातत्व विभागं ग्वाहालि याःगु खः ।
ज्याझ्वलय् मूपाहां नगर प्रमुख महर्जनं फल्चा पुनःनिर्माणया ज्याय् ग्वाहालि यानादीपिं पुरातत्व विभागया इन्जिनियर शोभा महर्जन, स्थानीय धर्म महर्जनयात दोसल्लां न्ययेकाः मतिनाया चिं लःल्हानादीगु खः ।
झिंनिदां ध्यबा खर्च यानाः दयेकूगु जुयाः उकिया नां नं झिंनिदाँ तं जू वंगु धइगु स्थानीयतय् धापू दु ।
LEAVE YOUR COMMENTS