कास्की नेवाः खलःया न्हूदँया भिंतुना र्याली
येँ(नेपालभाषा टाइम्स)÷ नेपाल संवत् ११४५ न्हूदँयात लसकुस यासें पोखराय् नं न्हूदँया भिंतुना ¥याली पिथंगु दु । कास्की नेवाः खलःया आह्वानय् बागबजार तायमचा समितिया ग्वसालय् वंगु नेपाल संवत् ११४५ कछलाथ्व पारु, न्हूदँकुन्हु भिंतुना र्याली पिथंगु खः ।
समितिया ग्वसालय् पोखराया बागबजारं पिदंगु न्हूदँया भिंतुना र्याली विन्ध्यवासिनी, मोहरिया भैरव त्वाः, भिंद्यः त्वाः जुयाः खलःया नेवाः छेँय् थ्यंकाः क्वचायेकूगु खः । र्याली क्वचायेकाः नेवाः छेँय् छगू भिंतुना सभाया नं ग्वसाः ग्वःगु खः ।
भिंतुना सभाय् मूपाहांकथं झायादीम्ह पोखरा महानगरपालिकाया प्रमुख धनराज आचार्यं देय्या करि ६२ गू स्वयां अप्वः जिल्लाया ८० स्वयां अप्वः जातजातिया मनूत पोखराय् बसोबास यानाच्वंगु छगू तथ्यांकं क्यंगु दु धयादिल । गुलिखे जातजातिया कला, संस्कृति ल्यंकेत तकं थाकुया वयाच्वंगु अवस्थायात ध्यानय् महानगरपालिकां थीथी जातजातिया कला, धर्म, संस्कृति व साहित्य ल्यंका तयेत ग्वाहालि याना वयाच्वनागु दु धयादिल ।
न्हू पुस्ताया मांभाय् ल्हायेगु चलन तना वनाच्वंगु खँय् चिउताः प्वंकादिसें प्रमुख आचार्यं गुलिखे जातजातिया भाषाया लिपि मदयाः बोलीचालीइ जक सीमित जुयाच्वंगु व भाषा ल्यंकेत महानगरपालिका ग्वाहालि यायेत तयार दु धयादिसें थ्व अवसरयात सदुपयोग यायेत इनाप यानादिल ।
खलःया नायः अशोक पालिखें विविधतां जाःगु भिंतुना सांस्कृतिक ¥यालीया आयोजनां पर्यटकीय नगरी पोखरायात पर्यटकीय राजधानीया कार्ययोजना न्ह्यःने यंकेत स्वंगुलिं तहया सरकारयात ग्वाहालि जू वनीगु विश्वास प्वंकादिल ।
खलःया नायः पालिखें दक्वं जातजातिया ज्याझ्वलय् सकलें ब्वति काये फइगु वातावरण ब्वलंकेमाःगु खँय् बः बियादिसें महानगरपालिां नं थःगु वार्षिक क्यालेन्डरय् पोखराय् च्वनाच्वंपिं थीथी जातजातिं हनीगु पर्व, नखःचखः जात्राया बारे जानकारी बीगु ल्याखं प्रचार प्रसार यायेत इनाप यानादिल ।
र्यालीइ पोखराया थीथी ४० गू स्वयां अप्वः खलः, पुचः, संघसंस्था, समूहं ब्वति काःगु खः । ¥यालीइ ब्वति काःगु खलः, पुचःमध्ये रुपा देउराली नेवाः खलकं न्हाप सिरपाःकथं नीन्याद्वः तका दां ल्हातय् लाकेत ताःलाःगु दुसा फेदी नेवाः खलः, झीगु भाय् झीगु संस्कृति पुचः व भिमसेन टोल मिसा पुचलं छसिकथं लिउ, लियांलिउ व हःपाः सिरपाः त्याकेत ताःलाःगु दु ।
र्यालीइ कास्कीइ च्वंगु ४८ गू कचा खलःलिसें ब्राम्हण समाज, क्षेत्री समाज, तमु ंिधं कास्की, मिरुवा तमु समाज, हिमाली सांस्कृतिक परिवार, नेपाल मगर समाज, ह्योल्मो समाज, चौधरी समाज, नेपाल तामाङ घेदुङया यानाः नीन्यासः स्वयां अप्वः मनूतय्सं ब्वति काःगु खलःया मूछ्याञ्जे श्रीकृष्ण कतिलां जानकारी बियादिल ।
खलःया नायः पालिखेया सभापतित्वय् वरिष्ठ न्वकु तीर्थ श्रेष्ठं लसकुस यासें न्ह्याःगु ज्याझ्वलय् नेपाल उद्योग वाणिज्य संघया वरिष्ठ उपाध्यक्ष अञ्जन श्रेष्ठ, नेपाल तामाङ घेदुङ कास्कीया अध्यक्ष भक्त तामाङ लगायतया पाहांपिंसं भिंतुना न्वचु तयादीगु खः ।
LEAVE YOUR COMMENTS