सांस्कृतिक पत्रकारिता तालिम क्वचाल

यल – नेवाः पत्रकार राष्ट्रिय दबूया ग्वसालय् जूगु स्वन्हुयंकंया सांस्कृतिक पत्रकारिता तालिम क्वचाल । तालिमय् मूर्त–अमूर्त सम्पदा प्रवद्र्धनय् सांस्कृतिक पत्रकारिता महत्व बारे प्रशिक्षण बिउगु खः । यल महानगरपालिकाया ग्वाहालिं जूगु स्वन्हुयंकंया तालिम वंगु असार २० गतेनिसें शुरु जूगु खः ।

स्वन्हुयंकंया उगु तालिम सांस्कृतिक ख्यलय् पत्रकारिता याना वयाच्वनादीम्ह रामकृष्ण रेग्मी, राष्ट्रिय समाचार समिति (रासस)या प्रधान सम्पादक राजु शाक्य, नेपालभाषा टाइम्सया सम्पादक सुरेश मानन्धरं तालिम बियादीगु खः । तालिमय् एफएम, अनलाइन, टेलिभिजन, छापा संचारमाध्यमय् क्रियाशील नापं पत्रकारिता ख्यलय् अभिरुचि दुपिं पीम्हं मल्याक प्रशिक्षार्थीतय् सहभागिता दुगु खः ।

प्रशिक्षणया इलय् दबूया केन्द्रीय न्वकु नापं संचारकःमि सुरजवीर वज्राचार्यं थःगु अनुभव न्यंकादीगु खःसा तालिमया लिपांगु न्हिकुन्हु प्रशिक्षार्थीतय्त यल लाय्कू दुने यंकाः अनया काष्ठकला बारे स्थलगत रिपोर्टिंग नं याकूगु खः ।