यंतापौ चपाःछँे शिलान्यास

यल –  थनया शंखमूलय् च्वंगु यंतापौलय् चपाःछेँ दयेकीगु जूगु दु । चपाछेँ दयेकेगु निंतिं वंगु आइतवाः छगू ज्याझ्वःया दथुइ येँ क्षेत्र नं. १या सांसद व पुलांम्ह उपप्रधानमन्त्री प्रकाशमान सिंहं शिलान्यास यानादीगु दु । चपाःछेँ दयेकेगु निंतिं सांसद सिंहया सांसद विकास कोषपाखें ४५ गू लाख २० हजार तका ग्वाहालि स्वीकृत जुइधुंकूगु दु ।

यंतापौया फल्चा थौं स्वयां स्वसः दँ न्ह्यव हे यल गःछँेया ज्यापुतय्सं दयेकातःगु खः । थ्व थाय्यात आः नं गःछेँय् नं यंतापौ च्वंझायाच्वनादीम्ह किसलाल महर्जन व वय्कःया छेँजःपिंसं संरक्षण याना वयाच्वनादीगु दु । उबलय् शंखमूलया बुँ फाँटय् बुँज्या याःवइपिं किसानतय् आराम कायेत, बासं च्वनेत भाजु महर्जनया पुर्खापिंसं हे थन बल्चा दयेका बिउगु खः ।

अबलय्निसें वय्कःया पुर्खापिंसं हे थ्व फल्चाया संरक्षण मर्मत सम्भार याना वयाच्वंगु खःसा आः नं शंखमुलं बानेश्वर वनेगु लँ दथुइ लानाच्वंगु थ्व फल्चायात थीथी द्यः स्थापना यानाः संरक्षण याना वयाच्वंगु दु ।

आः थन हे सांसद विकास कोषया ध्यबा पाखें स्वतँजाःगु चपाःछेँ दयेकेत्यंगु खः । यंतापौ गुथिया नायः किसलाल महर्जनया सभापतित्वय् जूगु शिलान्यास ज्याझ्वलय् परराष्ट्रमन्त्री प्रदीप ज्ञवालीं नं झायादीगु खः । थ्व चपाःछेँ दयेकेत सांसद विकास कोषं वःगु ध्यबां मगाःगु ध्यबा चन्दां म्हयाः दयेकेगु खँ भाजु महर्जनया काय तीर्थलाल महर्जनं धयादीगु दु ।

सम्बन्धित बुखँ

LEAVE YOUR COMMENTS