थारू विद्रोह दिवस !

येँ – थारु कल्याणकारी सभां संविधान संशोधन, सांसद रेशम चौधरीया रिहाई लगायतया १४ बुँदे माग तत्काल सम्बोधन यायेत माग याःगु दु । म्हिगः चितवनया सौराहय् जूगु एकीकृत थरुहट राष्ट्रिय भेला लिपा २१ बुँदे घोषणा पौ जारी यासें सभां उगु माग याःगु खः । सभां भदौ ७ गते टिकापुरय् जूगु घटनायात ‘विद्रोह दिवस’या रुपय् न्यायेकेगु निर्णय नं याःगु दु ।

थारु कल्याणकारी सभां टिकापुर घटना बारे लाल आयोगं सरकारयात लःल्हाःगु प्रतिवेदन सार्वजनिक यायेमाःगु माग नं याःगु दु । अथे हे वइगु भदौ ७ गते सत्याग्रह अभियान कथं कैलालीनिसें येँ तक प्रदर्शन यायेगु तयारी जुयाच्वंगु खँ नं सीदुगु दु ।

उकथं हे थरुहट आन्दोलनयात सशक्त व प्रभावकारी दयेकेत निरन्तर संघर्षया ज्याझ्वः यायेगु कथं योजना दयेकेगु व विद्रोहया कार्यदिशा क्वःछीगु निर्णय नं भेलां याःगु दु । भेलां प्रधानमन्त्री केपी शर्मा ओलीयात ज्ञापनपौ बीगु निर्णय नं याःगु दु ।