सभामुखय् अग्नि सापकोटा सिफारिश
येँ – नेपाल कम्युनिष्ट पार्टी (नेकपां) सभामुखय् अग्नि सापकोटायात उम्मेदवार दयेके गु निर्णय याःगु दु । प्रधानमन्त्री निवास बालुवाटारय् म्हिगः च्वंगु नेकपाया सचिवालय बैठकं सापकोटायात सभामुख दयेकेगु निर्णय याःगु खः । पुलांम्ह सभामुख कृष्णबहादुर महरायात बलात्कारया द्वपं लाये धुंकाः वय्कलं राजीनामा बिउगु प्यला लिपा न्हूम्ह सभामुखय् सापकोटाया नामय् सहमति जूगु खः । थ्व स्वयां न्ह्यः प्रधानमन्त्री लिसें नेकपाया अध्यक्ष केपी शर्मा ओलीं थःगु पक्षय् दुम्ह पुलांम्ह सभामुख सुवास नेम्वाङयात सभामुख दयेके माःगु अडान कयाच्वंगु खः ।
म्हिगः सुथय् निम्ह अध्यक्षपिं प्रधानमन्त्री ओली व पुष्पकमल दाहाल दथुइ वार्ता जूगु खःसा वयां लिपा सचिवालयया बैठक सःतूगु खः । निम्ह अध्यक्ष दथुइ जूगु वार्ता लिपा प्रम ओलीं थःगु पक्षयाम्ह नेतायात सभामुख दयेकेमाः धकाः कयाच्वंगु अडान लित कयादीगु खः । म्हिगः सुथय् जूगु वार्ताय् अध्यक्ष दाहालं पुलांगु सहमति कथं माओवादी पृष्ठभूमिपाखें हे सभामुख दयेकेमाः धकाः अडान काये वं मेम्ह अध्यक्ष लिसें प्रम ओली लिचिलादीगु खः । सचिवालयया बैठकय् थःगु बहुमत मदये वं ओली लिचिलेत बाध्य जूगु खँ धाःगु दु ।
अग्नि सापकोटायात सभामुख दयेकेगु सचिवालयया निर्णय लिपा उपसभामुख शिवमाया तुम्बाहाम्फें नं र ाजीनामा बीगु जूगु दु । संविधान कथं छगू हे पार्टीया सभामुख व उपसभामुख जुइ मदइगु प्रावधान कथं उपसभामुख तुम्बाहाम्फें राजीनामा बीत्यंगु खः । पुलांम्ह सभामुख कृष्णबहादुर महरां राजीनामा बीधुंकाः थःत सभामुख दयेके माः धकाः उपसभामुख तुम्बाहाम्फें अडान कया वयाच्वंगु खः । तर पार्टी सापकोटायात सभामुख दयेकेगु निर्णय यायेवं आः तुम्बाहाम्फे राजीनामा बीमाःगु अवस्था ब्वलंगु दु । थ्वहे झ्वलय् सापकोटायात सभामुख दयेकेगु सचिवालयया निर्णय लिपा प्रधानमन्त्री ओलीं उपसभामुख तुम्बाहाम्फेयात नापलानादीगु दु । ओली व दाहाल दथुइ सहमति जुइवं ओलीं तुम्बाहाम्फेयात बालुवाटार सःतादीगु खः । वय्कःपिं दथुइ छघौत्या स्वयां अप्वः सहलह जूगु खःसां नं छु खँ जुल धइगु विस्तृत विवरण धाःसा पित बिउगु मदुनि ।
थ्व स्वयां न्ह्यः प्रम ओलीं उपसभामुख तुम्बाहाम्फेयात पदं राजीनामा बीगु खःसा मन्त्री दयेकेगु प्रस्ताव तयादीगु खः । तर तुम्बाहाम्फें उकियात अस्वीकार यानादीगु खः । वय्कःयात सभामुखया लागिं दावी यायेत राष्ट्रपति विद्यादेवी भण्डारीं हे लिउने च्वनाः हःपाः बियाच्वंगु खँ नं चर्चाय् वःगु खः ।
LEAVE YOUR COMMENTS