मंगलवाः तक लिच्वः वइगु अनुमान

येँ (नेपालभाषा टाइम्स)- स्वंगू निर्वाचन क्षेत्रय् आइतवाः जूगु मतदानया लिच्वः मंगलवाः बहनी तकया दुने पिहां वइगु खँ निर्वाचन आयोगं धाःगु दु । मतदान क्वचाःगु फुक्क थाय्या मतगणना आइतवाःनिसें हे न्ह्याकेगु धकाः तयारी जूगु खःसां फुक्क थासय् आइतवाः मतगणना शुरु मजूनि । उकिं सोमवाः फुक्क क्षेत्रया लिच्वः पिहां वइ धाःसां अन्तिम लिच्वः धाःसा बुधवाः तक जक सीके फइगु अनुमान जुयाच्वंगु दु । अथे धाःसां मतगणनाय् उम्मेदवारतय्सं काइगु अग्रताया आधारय् सु त्याइ सु बुइ धकाः अनुमान धाःसा याये फइगु खँ धाःगु दु ।

स्वंगुलिं निर्वाचन क्षेत्र संवेदनशील प्रकृतियागु जूगुलिं स्वंगुलिं क्षेत्रय् सुरक्षा व्यवस्था कडा यानातःगु खँ धाःगु दु । सरकारं निर्वाचनया इलय् ल्वापुख्यापु जुइफु धकाः अनुमान यानातःगु खःसां म्हिगःया निर्वाचन धाःसा शान्तिपूर्वक हे क्वचाःगु खँ निर्वाचन आयोगं धाःगु दु । उकिं आः मतगणना नं अथे हे याउँक व शान्तिपूर्वक क्वचाइगु आशा यानातःगु दु । थ्व चुनावया लिच्वःपाखें देय्या राजनीतिइ खास लिच्वः मलाःसां मन्त्रिमण्डलया स्वरुप धाःसा पायेफुगु खँ धाःगु दु ।