ने. सं. ११४६ अनलागा सप्तमी -

बागेश्वरी मा.वि.या न्हूगु भवन दयेकेत जग नीस्वन

ख्वप (नेपालभाषा टाइम्स) बागेश्वरी माध्यमिक विद्यालयया न्हूगु भवन निर्माणया निंतिं जग स्वनेगु ज्या जुल । विद्यालय व्यवस्थापन समितिया दुजः मोहनप्रसाद प्रजापतिं विद्यालयया न्हूगु भवन निर्माणया निंतिं जग स्वनादीगु खः । भवनया जग स्वनादिसें व्यवस्थापन समितिया दुजः प्रजापतिं विद्यालयया भौतिक निर्माणलिसें शिक्षकशिक्षिकां गुणस्तरीया शिक्षा अभिवृद्धि यायेत मेहनत यायेमाःगु खँय् बः बियादिल ।

बागमति प्रदेश सरकारं नमूना विद्यालय घोषणा याःगु विद्यालयया प्रधानाध्यापक कृष्णप्रसाद धन्छां कर्मचारी प्रवृत्तिया मानसिकता त्वःताः विद्यालययात आवश्यक जूगु खण्डय् मेमेगु इलय् नं सेवा बीत तत्पर जुइमाः धयादिल । ख्वप नगरपालिका वडा नं. ९ या वडाअध्यक्ष रवीन्द्र ज्याख्वं नं भवन निर्माणय् प्रत्यक्ष अप्रत्यक्ष रुपं संलग्न सकसितं पारदर्शी रुपं ज्या यानाः इलय् हे सिधयेकेत इनाप यानादिल ।