
येँ – चीनय् न्यनाच्वंगु कोभिड १९ (कोरोना भाइरस)या संक्रमणया कारणं नेपाल भ्रमण वर्ष २०२०यात हे बांमलाक लिच्वः लाकीगु ग्याःचिकु सुरु जूगु दु । सरकारं थ्व दँय् भ्रमण वर्ष घोषणा यानाः दछिया दुने २० लाख पर्यटक नेपाः दुत हयेगु तःधंगु लक्ष्य तयातःगु दु । थुकिया निंतिं तःधंगु प्रचारप्रसार यानाः सुरु नं यायेधुंकूगु दु ।
तर कोभिड १९ भाइरसं यानाः चिनियाँ पर्यटकया लिसें चीन जुयाः वइपिं पर्यटकत नं दुहां मवल धाःसा सरकारया लक्ष्य पूमवनीगु खनेदयाच्वंगु दु । कोभिड १९ भाइरसं चीनय् झिंस्वम्हं मल्याक मनूत सीधुंकूगु दुसा ६० हजारं मल्याक मनूतय्त संक्रमण जुइधुंकूगु दु । कोरोना भाइरस मेथाय् न्यना मवनेमा धकाः तःगू देशं चीनय् हवाइ सेवा हे बन्द यानातयेधुंकूगु दु ।
थज्याःगु अवस्थाय् नेपाःया पर्यटन व्यवसायय् नं लिच्वः लायेफुगु संकेत वंगु जनवरीया पर्यटक आगमनया तथ्यांक क्यनेधुंकूगु दु । थगुने जनवरी महिनाय् जक नेपाः वःपिं विदेशीतय् ल्याः ८१ हजार २७३ म्ह दुगु खः । थुगुसी थ्व ल्याः २ प्रतिशतं म्हो जुयाः ७९ हजार ६८६ जक दु । भ्रमण वर्षया तच्वःगु प्रचारप्रसारया कारणं पर्यटकतय् ल्याः अप्वयेमाःगुलिइ अःखबतं म्हो जुयावंगुलिं लक्ष्ययात हे प्रभावित याइगु आशंका पयर्टन व्यवसायीतय्सं यानाच्वंगु दु ।
तर जनवरीइ नेपाः दुहां वःपिं चिनियाँतय् ल्याः धाःसा थगुने स्वयां छुं भचा अप्वः दु । थगुने जनवरीइ १२ हजार ९१६ म्ह चिनियाँ नेपाः दुहां वःगु खःसा थगुुसी थ्व हे अवधिइ १९ हजार ३०३ म्ह चिनियाँत नेपाः दुहां वःगु दु । थगुनेया तथ्यांक कथं नेपाः दुहां वःपिं थ्यंमथ्यं १२ लाख पर्यटक मध्ये थ्यंमथ्यं १५ प्रतिशत चिनियाँत दुगु खः ।
थुगुसी सरकारं भ्रमण दँया झ्वलय् चिनियाँ पर्यटकत हे अप्वः दुत हयेगु लक्ष्य तयातःगु दु । सरकारं छुं मखुसां न्यागू लाख चिनियाँतय्त नेपाः हयेगु ताः तयातःगु दु । चिनियाँ राष्ट्रपतिया नेपाः भ्रमणया झ्वलय् जूगु अनौपचारिक खँल्हाबल्हाय् नं न्यागू ला चिनियाँ नेपाः दुहां हयेगु बारे सहलह जूगु खः ।
तर आः चीनय् न्यनाच्वंगु भाइरसया कारणं थ्व लक्ष्य धाःसा पूवनीगु खँय् शंका जुयाच्वंगु दु । थुगुनेया अनुपातय् हे चिनियाँत दुत हयेगु खःसां सरकारं तयातःगु लक्ष्य २० लाखया १५ प्रतिशतया ल्याखं स्वंगू लाख चिनियाँत नेपाः दुत हयेमाःगु जुइ । आःया अवस्थाय् थ्व स्वंगू लाख हयेत नं थाकुइगु खँ पर्यटन व्यवसायीतय्सं धयाच्वंगु दु ।
थौंकन्हय् नेपाः व चीन दथुइ हवाई सेवा विस्तार जुयावंगुलिं दँय् न्यागू लाख ति धयाथें पर्यटक दुत हयेफइगु क्षमता धाःसा दयेधुंकूगु दु ।तर कोरोना भाइरसया कारणं प्रत्यक्ष अन्तर्राष्ट्रिय लिच्वः हवाई आवागमनय् हे लानाच्वंगु दु । विश्व स्वास्थ्य संगठनं कोरोना भाइरसया हे कारणं अन्तर्राष्ट्रिय आवागमन व व्यापारय् नियन्त्रण यायेमाःगु अवस्था मदु धयाच्वंगु दु ।
अथे खःसां व्यवहारय् धाःसा थथे जुयाच्वंगु मदु । गुलिखे देशं चीनलिसे हवाइ स्वापू हे थप्प यानातःगु दुसा विश्वन्यंकंया पर्यटकत नं थ्व हे भाइरसया कारणं उखेथुखे जुइत उत्सुक जुयाच्वंगु खनेमदु । उकिसनं चीन जुयाः वये ला झन हे चाहे जुयाच्वंगु मदु । तर नेपालय् थौंकन्हय् अमेरिका, अष्ट्रेलिया थेंज्याःगु देशं दुहां वइपिं पर्यटकत अप्वः चीन जुयाः वयेगु यानाच्वंगु दु ।
थुपिं पर्यटकत चीन वने चाहे मजूगुलिं नं नेपाः दुहां वइपिं पर्यटकतय् ल्याखय् लिच्वः लाइगु खनेदु ।आः हे नं चीनया लिसें कोरिया व जापानं वइपिं पर्यटकतय् ल्याः म्हो जुया वयेधुंकूगु खँ पर्यटन व्यवसायीतय्सं धाःगु दु । आः चीनय् न्यना वनाच्वंगु कोरोना भाइरसया कारणं नेपाःया पर्यटन व्यवसायय् लाइगु लिच्वः वइगु बसन्त ऋतुइ खनेदइगु खँ धाःगु दु ।
LEAVE YOUR COMMENTS