तिंख्यःध्वाखायात नेवाः स्वरुप बीगु

येँ – येँया न्हूसतकय् च्वंगु ऐतिहासिक तिंख्यःध्वाखायात आः नेवाः स्वरुप बियाः न्हूधाः याइगु जूगु दु । उकिया नापनापं न्हूसतकया जःखः थीथी कथं समाः यानाः नेवाः वहः वयेक स्वरुप बीगु ज्या नं जुइत्यंगु दु । येँ महानगरपालिकाया पहलय् थ्व ज्या न्ह्यायेत्यंगु खःसा उकिया डिजायन नं तयार जुइधुंकूगु खँ सीदुगु दु ।

न्हूसतक दुहां वयेगु मूध्वाखा जुयाच्वंगु तिंख्यःध्वाखाया स्वरुप आः तसकं पुलां जुयाः जीर्णोद्धार हे याये मालीगु अवस्थाय् थ्यंगुलिं येँ महानगरपालिकां उकियात न्हूगु रुप बियाः दयेकेत्यंगु खः । उकिया नापनापं न्हूसतकंनिसें जुद्ध शालीक तक व जुद्ध शालीकं जवय् वंघः तक अले खवय् दफ्तर तकया लँपुयात नं समाः यानाः न्हूगु स्वरुप बीत्यंगु खँ सीदुगु दु ।

थ्व न्हूगु स्वरुप लिपा तिंख्यःध्वाखां दुहां वयेवं न्हूसतकया मुक्कं रूप हे नेवाः पहः वइ । न्हूसतकयात न्हूगु रूप बीगु झ्वलय् उकी आः दाछि अप्पा समेत तयाः स्वरुप हिलेगु ज्या जुइ । तिंख्यःध्वाखाया स्वरुप थीथी इलय् थीथी कथं हिला वयाच्वंगु दुसा थुपालय् धाःसा उकियात नेवाः पहः वयेक हिलेत्यंगु खः ।

अनं दुहां वयेवं सतक पेटीया निखेरं बार तयेगु ज्या जुइसा उगु बारय् कुमारी माजुया स्वंगःगु मिखा व मरु सतःया किपा दुगु डिजायन तयेगु ज्या जुइ । सतकया पेटीइ छहाकः जुइक हे बार तयेगु ज्या जुइ । अथे हे सतकया जःखः सतक मतया व्यवस्था नं याइगु जूगु दु । सतक मत तइगु थां (पोल) या डिजायन धाःसा धुन्या शैलीयागु जुइ धाःगु दु ।

स्वयेबलय् धुन्या थेंच्वंगु डिजायनया थामय् सतक मतया नापनापं ध्वाँय् ब्वयेकेगु ज्या जुइ । थुकिया डिजायन समेत तयार जुइधुंकूगु दुसा सम्बद्ध जनप्रतिनिधिपिंसं उकी सामान्य सुधार यानाः अन्तिम रूप बीगु खँ धाःगु दु । थ्व ज्यां भिजिट नेपाल दँयात नं तिबः जुइगु विश्वास यानातःगु दु ।

सम्बन्धित बुखँ

LEAVE YOUR COMMENTS