राम मन्दिर विरुद्ध येँय् धर्ना

येँ (नेपालभाषा टाइम्स) – भारतया अयोध्याय् म्हिगः राममन्दिर दयेकेगु लागिं भूमि पूजन जूगु इलय् नेपालय् धाःसा उकिया विरुद्ध बौद्धमार्गीतय्सं प्रदर्शन यात । राम जन्मभूमि धयातःगु उगु थासय् बौद्ध विहारया अवशेषत लुया वःगुलिं उकियात बौद्धस्थल कायम यायेमाः
धकाः भारतीय बौद्धतय्सं यानाच्वंगु प्रदर्शनया समर्थनय् नेपाःया बौद्धमार्गीतय्सं म्हिगः लैनचौरस्थित भारतीय दूतावासया पिने धर्ना बिउगु खः ।

थीथी जातीया बौद्ध धर्मावलम्बीतय्सं ब्वति काःगु उगु धर्ना लिपा भारतीय दूतावासयात छगू ज्ञापनपौ नं लःल्हायेगु ज्या जूगु खः । साकेत नगर सरोकार समिति धइगु नां तयाः थनया बौद्ध धर्मावलम्बीतय्सं याःगु उगु प्रदर्शन मौन रुपं न्ह्याःगु खःसा थुकिं यानाः भारतय् आन्दोलन यानाच्वंपिं बौद्ध समुदाययात नैतिक बल प्राप्त जुइगु खँ धाःगु दु ।