
येँ – नेवाःतय्गु राष्ट्रिय संगठन नेवाः देय् दबुलिं नेवाः समुदायया थीथी गुथितय्गु राष्ट्रिय सम्मेलन याइगु जूगु दु ।
देय् दबूया जातीय संगठन दुथ्याःगु जातीय परिषद्या बैठकं नेवाःतय् गुथिया राष्ट्रिय सम्मेलन यायेगु निर्णय याःगु खः । बुधवाः नेवाः देय् दबूया नायः नरेश ताम्राकारया सभापतित्वय् जूगु जातीय परिषद्या मुँज्यां सकल गुथिया गुथ्याःत दुथ्याकाः उगु सम्मेलन यायेगु निर्णय याःगु खः ।
सरकारं गुथि विधेयक लित काये धुंकूगु अवस्थाय् आः गुथि सम्बन्धि न्हूगु विधेयक, नेवाःतय्गु परम्परागत प्रथाजन्य गुथियात स्वायत्तता बीमाःगु विषय नापं गुथिया समस्यायात थुइकाः मंकाः धारणा दयेकेगु निंतिं गुथि सम्मेलन यायेमाःगु आवश्यकता तायेकाः थ्व निर्णय याःगु खँ धाःगु दु ।
नेवाःतय्गु फुक्कं जातीय संगठनपाखें थःथःपिनिगु लागा लागाय् नापं जातीय कथंया गुथि सम्मेलन व मुँज्या यायेगु अले दकलय् लिपा नेवाः देय् दबूया संयोजनय् मंकाः कथं राष्ट्रिय स्तरया गुथि सम्मेलन यायेगु निर्णय याःगु खः । वहे सम्मेलनय् वःगु गुथितय्गु धापूया आधारय् न्हूगु गुुथि विधेयक दयेकेगु लागिं नेवाःतय्गु
मंकाः अवधारणा तयार यायेगु खँ नं धाःगु दु ।
आः गुथि सम्बन्धी विधेयक भूमि सुधार मन्त्रालयं हःगु जूगुलिं उकिया विरोध यासें गुथि सम्बन्धी ज्याखँ संस्कृति मन्त्रालय अन्तर्गत तयेमाःगु माग नं नेवाः ख्यलं जुइ धाःगु दु ।
गुथि विधेयक विरुद्ध सरकारयात खबरदारी यायेगु लागिं कन्हय् असार १४ गते जुइगु मोटरसाइकल ¥याली व २० गते जुइगु ऐक्यबद्धता सभाय् नं जातीय संगठनतय्त सक्रिय रुपं सहभागी जुइत देय् दबुलिं आह्वान याःगु दु ।
LEAVE YOUR COMMENTS