मंसिर २ गते बिदा बीत माग

येँ (नेपालभाषा टाइम्स) – नेपाल संवत् राष्ट्रिय न्हूदँ समारोह समिति ११४१ या नायः रमेश महर्जनया नेतृत्वय् शहरी विकासमन्त्री कृष्णगोपाल श्रेष्ठयात नापलासें कोरोना महामारीया दथुइ न्हूदँ हनेगु सम्बन्धय् सहलह ब्याकूगु खः ।

सहलहय् नायः महर्जनं थुगुसीया न्हूदँ सामाजिक संजालपाखें हलिंन्यंकं थ्यंकेगु नितिं थीथी कथंया तयारी जुयाच्वंगु खँ कनादीगु खः । लिसें वय्कलं समारोह समितिया ग्वसालय् स्वनिगःन्यंकं न्हूदँ न्यायेकेत नीस्वनातःगु समारोह समितिनाप मंकाः मुँज्या च्वनाः न्हूदँ कछलाथ्व पारु (मंसीर १ गते) न्यायेकेगु निर्णय जूगु व थ्वयां लिपा मंकाः वक्तव्य पिथनेगु जानकारी नं बियादिल । नायः महर्जनं नेवाःतसें मंसीर २ गते किजापुजा याइगु जूगुलिं उगु दिं सरकारपाखें सार्वजनिक विदा बिइमाःगु माग नं यानादीगु खः ।

अथेहे, दँय् दसंथें नेपाल सरकारपाखें न्हूदँयात कयाः यायेमाःगु ज्या सकतां यायेत नं इनाप यानादिल । शहरी विकासमन्त्री श्रेष्ठं कोरोना भाइरस संक्रमणया इलय् थुगु संक्रमणपाखें बचे जुयाः न्हूदँ न्यायेकेमाःगु खँय् बः बियादिसें थःपिंसं मंसिर २ गते नेवाःतय् किजापुजाया दिं लाःगुलिं थौं हे च्वनेगु मन्त्रिपरिषदया मुँज्याय् प्रस्ताव यंकेगु खँ कनादीगु खः ।