यल संग्रहालयय् बुंगद्यःया अस्थायी ब्वज्या

यल – थनया पाटन संग्रहालयं विदेशी पर्यटकतय आकर्षण अप्वयेकेगु ल्याखं बुंगद्यःया अस्थायी प्रदर्शनी शुरु याःगु दु । संग्रहालयं वर्षा व सहकालया द्यःकथं कयातःम्ह बुंगद्यःया अस्थायी प्रदर्शनी याःगु खः । संग्रहालयं यल लाय्कू लागाय् चाःहिउ वइपिं आन्तरिक व बाह्य पर्यटकया आकर्षणया निंतिं १७ इन्च ताःहाकःगु रथया प्रदर्शनी याःगु खः ।

देय्या हे दकलय् ताःहाकःगु जात्राकथं कयातःगु बुंगद्यःया जात्रा वंगु छुं दिं न्ह्यः जक क्वचाःगु खः । वंगु बछलाथ्व पारुनिसें शुरु जूगु बुंगद्यःया जात्रा थ्व हे वंगु तछलाथ्व सप्तमिकुन्हु जावलाख्यलय् भोटो क्यनेवं क्वचाःगु खः । जात्रा क्वचाःगु छुं दिं लिपा हे संग्रहालयं पीन्हुया निंतिं उकथंया प्रदर्शनी याःगु खः ।

संग्रहालयं थ्व स्वयां न्ह्यःनं थीथी इलय् आपालं किपा ब्वज्या यायेधुंगु व वइगु दिनय् नं थुकथंया उत्कृष्ट प्रदर्शनीयात निरन्तरता बिया वनेगु संग्रहालयया कार्यकारी निर्देशक सन्दीप पोखरेलं जानकारी बियादिल ।

संग्रहालयया प्रमुख सुरेशमान लाखें यल लाय्कूया केशवनारायण चुकय् जुयाच्वंगु बुंगद्यःया प्रदर्शनीइ बुंगद्यःया रथय् प्रयोग जुइगु रथया नमूना, घःचाः, भैरवया ख्वाःपाः, कर्कोटक नागया पाता, बुंगद्यःया हुलाक टिकट, रथ निर्माण यायेगु ज्याय् यलवासीया योगदान, नेवाः परम्परा आदिया बारे नं जानकारी बीगु कनादिल ।

संग्रहालयं बिउगु जानकारीकथं थगुने निगू लाखं मल्याक अवलोकनकर्तातय्सं संग्रहालय भ्रमण याःगु खःसा थुगु दँय् नं वंगु जेठ मसान्त तकया दुने निगू लाख नीन्याद्वः स्वयाः अप्वःसिनं अवलोकन यायेधुंकूगु दु ।

बुंगद्यःया अस्थायी ब्वज्याया इलय् वाङ्मय शताब्दीपुरुष सत्यमोहन जोशी, शिक्षा, विज्ञान तथा प्रविधि मन्त्रालयया सचिव नापं संग्रहालय विकास समितिया अध्यक्ष मोहनकृष्ण सापकोटा, संग्रहालयया पुलांम्ह दुजः प्रा. डा. प्रेमकुमार खत्री, पुरात्वया निमित्त महानिर्देशक दामोदर गौतम लगायतं बुंगद्यःया अस्थायी प्रदर्शनीं मचा, ल्यायम्हल्यासे, ज्याथजिथि लगायतया दक्वं उमेर समूहयापिंसं बुंगद्यःया जात्रा, रथ निर्माणलिसें थुकिया ऐतिहासिक पक्षया बारे जानकारी काये फइगु विश्वास याःगु दु ।