लगानी सम्मेलनय् वइपिंत सतक विस्तार पीडितया ध्यानाकर्षण

येँ –  उपत्यकाब्यापी सडक विस्तार पीडित संघर्ष समितिं नेपाल सरकारं यायेत्यंगु लगानी सम्मेलनय् ब्वति काइगु दातृ निकाय व नेपाःस्थित थीथी देशया राजदूतावासतय्त कन्हय् मंगलवाः ध्यानाकर्षण पत्र बीगु जूगु दु । ध्यानार्षण पत्र बीगु नितिं उपत्यकाब्यापी सडक विस्तार पीडित संघर्ष समितिया न्याम्ह न्वकुया नेतृत्वय् न्यागू पुचः दयेकाः मंगलवाः न्हिछि हे झिंन्यागू थासय् ध्यानाकर्षण पौ बीगु तयारी याःगु खः ।

सर्वोच्च अदालतया फैसला, अन्तर्राष्ट्रिय कानुन, मावन अधिकारया पालना यानाः जक नेपालय् विकास निर्माणया रुपय् ज्याय् लगानी यायेत व याकेत लिसें नेपाल सरकारयात नं उकिया पालना याकेत विशेष यानाः स्वनिगःया वस्तु अवस्थायात दुथ्याकाः ध्यानाकर्षण पौ बीत्यंगु खः ।

संघर्ष समितिं विश्व बैंक, एशियाली विकास बैंक लगायत नेपाःस्थित भारतीय दुतावास, चिनियाँ दुतावास, अमेरिकी दुतावास, बेलायती दुतावासय् थज्याःगु ध्यानाकर्षण पौ बीत्यंगु खँ ग्वसाः खलकं धाःगु दु । लिसें युरोपियन युनियन, नर्वेली दुतावास, स्वीस दुतावास, जापानी दुतावास, अष्टेलियन दुतावास, डेनमार्क दुतावास, फिनल्याण्ड दुतावासंनिसें कयाः दक्षिण कोरियाली दुतावासय् तकं ध्यानाकर्षण पौ लःल्हायेगु ज्याझ्वः तयातःगु दु ।

उमित बीगु थ्व ध्यानाकर्षण पौ नेपालभाषा, खस नेपाली भाय् व अंग्रेजी भासं तयार यानाः बीगु ग्वसाः दु । थ्वहे झ्वलय् कन्हय् बुधवाः स्वनिगःया स्थानीय जनताया नेवाः वसः पुनाः द्वलंद्वः मनूतय्सं यलया पूच्वय् च्वंगु संयुक्त राष्ट्र संघया ज्याकू पिने प्रदर्शन यायेगु नापं ध्यानाकर्षण पौ नं बीगु ग्वसाः दयेकूगु दु ।

सतक विस्तारया फुक्कं ज्या स्थगित
सतक विस्तार विरुद्ध सरकारं तःगु पुनरावलोकनया निवेदन तकं सर्वोच्च अदालतं खारेज याना बीवं आः सतक विस्तारया लागिं जुयाच्वंगु सम्पूर्ण ज्या आःयात स्थगित याःगु दु । तर सरकारं उकियात दिकागु हे जुल धकाः धाःगु धाःसा मदुनि । थुकिं यानाः खास यानाः सतक विस्तार यायेगु लागिं उपत्यका विकास प्राधिकरणं सतक दयेकीपिं ठेकेदारतय्त कमिशन नयाः बिया तयेधुंकूगु ठेक्काया ज्या प्रभावित जूगु दु । थःपिंत ठेक्का मलाइगु सम्भावना खने दया वःगु जूगुलिं सर्वोच्चय् पुनरावलोकन तयेगु ज्याय् ठेकेदारतय्सं नं ग्वाहालि याःगु खँ सूत्रं धाःगु दु ।

सम्बन्धित बुखँ

LEAVE YOUR COMMENTS