तत्काल आकाशे ताँ निर्माण मजुइगु

येँ – येँ महानगर पालिकां थःगु लागा दुने थीथी थासय् दयेकीगु धाःगु आकाशे ताँ निर्माण तत्काल शुरु मजुइगु जूग दु । येँ महानगरपालिकां सवारी साधन व्यस्त जुइगु व लँजुवाःतय् चाप अप्वइगु थीथी थाय्या अध्ययन यानाः अज्याःगु थासय् स्थानान्तरण याये जिउगु आकाशे ताँ दयेकेगु तयारी याःगु खः ।

येँ मनपां चालु आर्थिक दँया न्हापांगु लाय् उकथं सवारी साधन व लँजुवाःतय् चाप अप्वइगु थीथी च्यागू थासय् स्थानान्तरण याये फइगु आकाशे ताँ दयेकेगु तयारी याःगु खः । तर येँ मनपाया कथं उकथंया ताँ निर्माण यायेत अझं छुं ई काइगु खँ धाःगु दु । येँ मनपाया प्रवक्ता ईश्वमान डंगोलं कनादीकथं आकाशे ताँ निर्माणया निंतिं प्राविधिक रुपं सहलह जुयाच्वंगु कारणं निर्माणया ज्या न्ह्याकेत अझं छुं ई काइगु जूगु दु ।

येँ मनपां थीथी थाय्या अध्ययन लिपा च्यागू थासय् आकाशे ताँ दयेकेगु निर्णय याःगु खः । थ्व ल्याखं न्हापांगु चरणय् तत्काल चाबही व पुरातत्व विभाग न्ह्यःने निगू थासय् आकाशे ताँ दयेकेगु धाःगु खःसां आः वयाः उगु थासय् नं उकथंया ताँ निर्माण मजुइगु जूगु दु । येँ मनपां चालु आर्थिक दँया न्हापांगु लाय् थुपिं निगू थाय् बाहेकं मेगु खुगू थाय् टेकु भन्सार, त्रिपुरेश्वर, पुतलीसतक, महाराजगंज, कोटेश्वर व गौशाला चोकय् आकाशे ताँ दयेकेगु योजना न्ह्यःने हःगु खः ।

थुपिं दक्वं थासय् सवारी साधनया चाप अत्याधिक मात्राय् दइगु व थुकिं यानाः लँजुवाःतय्त लँ त्वाःल्हायेत तसकं समस्या जुइवं आकाशे ताँ दयेकेगु योजना न्ह्यःने हःगु खः । सतक दुर्घटना न्यूनीकरण, ट्राफिक व्यवस्थापनलिसें सवारी साधन व यात्रुतय् सहजताया निंतिं येँ मनपां सडक विभाग व ट्राफिक प्रहरीलिसेया सहकार्यय् उगु योजना हःगु खः ।

येँ महानगर दुने थौंकन्हय् वीर अस्पताल लुँहिति, न्हूसतक, रत्नपार्क–भोताहिति, जमः, रत्नपार्क, बागबजाः, पलांगु बसपार्क, भद्रकाली व न्हूगु बसपार्कय् आकाशे ताँ संचालन जुयाच्वंगु दु ।

 

सम्बन्धित बुखँ

LEAVE YOUR COMMENTS