ने. सं. ११४३ तछलागा चौथी -

मिं नःगु छेँया पीडित परिवारयात आर्थिक ग्वाहालि

येँ- यल महानगरपालिकां थनया चक्रबहीस्थित नःबहालय् छेँ मिं नयाः पीडित जूपिंत आर्थिक ग्वाहालि बीगु जूगु दु । यल मनपां चक्रबहीया मिं नयाः पीडित जूपिं छेँजःयात १० गू लख आर्थिक ग्वाहालि यायेगु निर्णय याःगु खः ।

यल महानगरपालिका महानगरीय विपद् व्यवस्थापन समितिया बैठकं मिं नयाः प्रभावित जूगु परिवारयात राहतकथं १० गू लख तका बीगु निर्णय याःगु खः । समितिया बैठकं मिं नयाः घाःपाः जूपिं सकसिगुं उपचार खर्च महानगरपालिकां हे ब्यहोरे यायेगु नं निर्णय याःगु दु ।

यल महानगर प्रमुख चिरिबाबु महर्जनं समितिया बैठकय् मिं नयाः क्षति जूगु छेँ पुनःनिर्माणया निंतिं नक्सा पासय् छुट बीगु नं निर्णय जूगु खँ कनादीगु दु । समितिया बैडकय् यल मनपा १२ वडापाखें नं घटनाया तत्काल लिपा छगू लख ग्वाहालि यानागु जानकारी वडाअध्यक्ष नारायणलाल अवालें बियादीगु खः ।

वंगु नेपाल संवत् ११४२ न्हूदँ (म्हपुजा) कुन्हु चक्रबहीया लक्ष्मीकृष्ण ताम्राकारया छेँय् मिं नयाः प्यम्ह सीगु खः । घटनाय् ताम्राकारलिसें वय्कःया म्ह्याय् अञ्जना, भौ रचना छय् निर्जल मदुगु खः । घटना जूगु इलय् छेँय् १० म्ह दुगु खःसा मेपिं घटनाय् लानाः घाःपाः जूपिंमध्ये निरज ताम्राकार अस्पतालं छेँय् लिहां वयेधुंकूगु दुसा ताम्राकारया म्ह्याय् सिर्जनाया धाःसा आः नं वासः यायेगु ज्या जुयाच्वंगु दु ।

प्रहरीया कथं उगु घटनाय् लानाः २० गू लख मं मल्याक क्षति जूगु दुसा घटना लिपा उर्जा, जलश्रोत व सिँचाइ मन्त्री पम्फा भुसाल, यलया थीथी जातीय संस्था, नेवाः देय् दबू यल महानगर कमिटी लगायतया संघसंस्थापाखें पीडितया निंतिं आर्थिक ग्वाहालि याःगु खः ।