ज्ञानेन्द्र मल्लया कीर्तिमानी अर्धसतकं नेपालं मलेसियायात बुकल

टि–२० विश्वकप एसिया छनोट

येँ – नियमित उपकप्तान ज्ञानेन्द्र मल्लया कीर्तिमानी ब्याटिङ्गया ग्वाहालिं टि–२० विश्वकपया एसिया छनोटय् नेपालं म्हिगः मलेसियायात बुकेत ताःलाःगु दु । म्हिगःया कासाय् कप्तानी याःम्ह मल्लं विस्फोटक ब्याटिङ्ग यासें नेपाःया निंतिं दकलय् याकनं अर्धसतक दयेकेगु कीर्तिमान तयेगु झ्वलय् २० बलय् हे अर्धसतक पूवंकूगु खः ।

थ्व झ्वलय् वं न्यागू चौका व स्वंगू छक्का थ्वाःगु खः ।कासा सुरु जुइ न्ह्यव वा वयेवं गुंगू ओभरय् क्वतहःगु कासाय् मलेसियां न्हय्गू विकेटया क्षतिइ ८२ रन दयेकूगु खः । नेपालं मुक्कं च्यागू ओभरय् स्वंगू विकेटया क्षतिइ विजय लक्ष्य चूलाकूगु खः ।थ्व छनोटय् शीर्षथासय् लाःगु टिमं सन् २०२० य् जुइगु विश्वकपया निंतिं ग्लोबल छनोटय् म्हितेखनी ।

ग्लोबल छनोटय् म्हितेगु निंतिं नेपालं आः जुयाच्वंगु एसिया छनोटय् म्हितीगु फुक्कं कासा त्याकेमाःगु हाथ्या दु । थ्वयां न्ह्यव म्हीग जूगु कासाय् नेपाः कमजोर कतारपाखें पराजित जूगु खः ।म्हिगःया कासाय् दकलय् याकनं ५० रन पूवंकेगु कीर्तिमान तयेगु झ्वलय् कप्तान मल्लं वंगु वालय् जक विनोद भण्डारीं २५ बलय् अर्धसतक दयेकाः तःगु कीर्तिमान त्वाःथःगु खः ।

सुरु निसें आक्रामक खनेदुम्ह मल्लं प्रारम्भिक ब्याट्सम्यान प्रदीप ऐरि लिसे जानाः न्हापांगु विकेटया निंतिं नं कीर्तिमानी साझेदारी याःगु दु । थुपिं निम्हेस्यां न्हापांगु विकेटया निंतिं ६६ रनया साझेदारी याःगु खः । मल्लं अर्धसतक दयेकेवं मेगु बलय् आउट जूगु खः । वयात मोहम्मद सहादतं आउट याःगु खः ।

सहादतं प्रदीप ऐरी व दीपेन्द्र सिंह ऐरीया विकेट नं काःगु खः । प्रदीप मुक्कं १२ रनय् व दीपेन्द्र २ रनय् आउट जूगु खः । नेपाःया निंतिं शरद भेषावकरं अविजित ३ रन व विनोद भण्डारी १३ रन थ्वाःगु खः । न्हापां फिल्डिङ ल्यःगु नेपालं म्हिगः सोमपाल कामीं न्हापांगु ओभरय् निम्ह कासामितय्त रन हे कायेके मबिसे आउट यानाः बांलाःगु सुरुवात याःगु खः ।

वं कासा सुरु जुइवं न्हापांगु बलय् हे अनवर अरुद्दिनयात व न्हापांगु ओभरया अन्तिम बलय् सफिक सर्राफयात शून्यय् आउट याःगु खः । थ्व लिपा मलेसियाया सइद अजिजं १५ बलय् ३० रन व भिरन्दीप सिंहं १७ बलय् २१ रन थ्वासें ८३ रनया लक्ष्य बिउगु खः । नेपाःया निंतिं बसन्त रेग्मीं निगू, सन्दीप लामिछाने व करण केसीं छगू छगू विकेट काःगु खः ।

न्हापांगु कासाय् कतारलिसे पराजित जुइधुंकूगुलिं नेपालं म्हितीगु स्वंगूलिं कासा त्याकेमाःगु अवस्थाय् दुगु खः । उकिं म्हिगःया कासा सुरु जुइ न्ह्यव वा वयाः कासाय् रद्द जुइगु स्थिति वःबलय् नेपाः कठीन अवस्थाय् लाःगु खः । तर वा दिइवं ९ ओभरया कासा जुल । म्हिगःया कासाय् नियमित कप्तान पारस खड्का जँया समस्याया कारणं मम्हितल । खड्कां मेगु कासा मम्हितीगु सम्भावना दु । नेपालं आः शनिवाः कुवेत लिसे व आइतवाः सिंगापुर लिसे म्हिती ।

सम्बन्धित बुखँ

LEAVE YOUR COMMENTS