नेपालं म्यानमारयात ८ विकेटं बुकल

येँ – नेपालं टी—२० विश्वकप एसिया छनोट कासाय् म्यानमारयात ८ विकेटं बुकूगु दु । टस त्याकाः न्हापां ब्याटिङ याःगु म्यानमारं १० ओभर दक्व विकेटया क्षतिइ २९ रन जक दयेकुगू खः। म्यानमारया हेट लिन होङं दकलय् अप्वः १६ रन दयेकलसा खुम्ह ब्याट्सम्यानतय्सं रन हे दयेके मफुत । नेपाः पाखें सन्दीप लामिछानें ४ व ललित राजवंशीं ३ विकेट काःगु खः ।

करण केसी व ललित भण्डारीं छगू छगू विकेट काल । म्यानमारं बिउगु ३० रनया सामान्य लक्ष्य नेपालं ३ ओभरय् २ विकेटया क्षतिइ पूवंकूगु । नेपाः पाखें करण केसीं १४, अनिल कुमार शाहं ११ रन व विनोद भण्डारीं अविजित १ रन दयेकूगु खः ।

म्यानमारयात नेपालं १२ दँ न्ह्यः सन् २००६य् निगू बल जक म्हिताः बुकूगु खः । उबलय् म्यानमार १२.१ ओभरय् १० रन दयेकाः अलआउट जूगु खः । ११ रनया लक्ष्य नेपालं निगू बलय् पूवंकाः विश्व रेर्कड तःगु खः । नेपालः आः शनिवाः मलेसिया नाप म्हिती ।