विश्व नेवाः सम्मेलनय् झिंन्यागू देय्या ब्वति

येँ – शुक्रवाः निसें येँय् जुइगु विश्व नेवाः सम्मेलनय् नेपाः लगायत १५ गू देय्या नेवाः प्रतिनिधिपिंसं ब्वति काइगु जूगु दु । सम्मेलनय् ब्वति कायेगु लागिं थीथी देय्या नेवाः प्रतिनिधिपिं येँय् थ्यंकः वयेधुंकूगु दुसा गुलिं लँय् हे लानाच्वंगु खँ सीदुगु दु ।
आः तक सीदु कथं सम्मेलनय् नेपाः लगायत भारत, बंगलादेश, यूएई, हंगकंग, जापान, बेलायत, स्पेन, पोर्चुगल, अमेरिका, क्यानाडा, नेदरल्याण्ड, वर्मा व थाइल्याण्डया प्रतिनिधिपिंसं ब्वति काइगु जूगु दु । अथे हे येँय् नेवाः दिवस हनीगु हे न्हि कुन्हु विश्वया करिब २० गू थासय् थीथी ज्याझ्वः यासें नेवाः दिवस हनीगु खँ नं सीदुगु दु । थुकी मध्ये अप्वः धइथें देशय् नेवाः मुना ज्याझ्वः यानाः नेवाः दिवस हनीगु ग्वसाः दु । थुकी मध्ये अमेरिकाया शियाटलय् ‘द लिजेण्ड अफ शंखधर’ संकिपा क्यनाः थ्व दिवस हनेगु ग्वसाः जुयाच्वंगु खँ धाःगु दु ।

अथे हे गनं सफू विमोचन व गनं पिकनिक ज्याझ्वः यानाः नं नेवाः दिवस हनेगु तयारी यानाच्वंगु खँ नं सीदुगु दु । येँ शुक्रवाः जुइगु सम्मेलनया उलेज्या वाङ्मय शताब्दी पुरुष सत्यमोहन जोशीं यानादीगु जूगु दु । निन्हुयंकं जुइगु ज्याझ्वलय् नेपाः लिसें थीथी देशय् च्वंपिं विज्ञपिंसं १८ गू ज्यापौ न्ह्यब्वइगु निश्चित जूगु दु । थुकी नेवाः संस्कृति, पत्रकारिता, मांभासं शिक्षाया अधिकार, नेवाः संगठन आदि विषयया ज्यापौत लानाच्वंगु दु ।सम्मेलन शुरु जुइ छन्हु न्ह्यः नेपालभाषा एकेदेमिं नेपाः ब्यांक्वेटय् स्वन्हुयंकं नेपालभाषा सफू ब्वज्या नं याइगु जूगु दु ।