‘जयवागेश्वरी देगः दुने लुयावःगु गजूबारे बांलाक अनुसन्धान यायेमाः’
येँ – जय– बागेश्वरी देगः दुने लुयावःगु गजूया कारणं देगःया पुनर्निर्माण लिबाके मजिउगु खँ स्थानीय व द्यःपाःलाःपिंसं धाःगु दु । स्थानीय, द्यःपाःलाःपिंसं देगः दुने हे लुयावःगु देगः बारे याकनं अनुसन्धान यानाः पुनर्निर्माणया ज्या न्ह्याकेमाःगु खँय् बः बिउगु दु । वि.सं. २०७२ सालया तःभुखाचं देगलय् क्षति जुइवं पशुपति क्षेत्रय् लाःगु थ्व देगःया पुनर्निर्माणया निंतिं देगः थुंबलय् देगः दुने हे मेगु गजू लुयावःगु खः ।
स्वतँजाःगु थ्व देगःया नितँ थुनेवं दुने मेगु गजू लुयावयेवं देगः थुनेगु ज्या दिकातःगु दु । देगलय् लुयावःगु गजू बारे पुरातत्वविद्पिनि बिचाः कायेगु निंतिं स्थानीयपिंसं म्हीग पुरातत्वविद्, संस्कृतिविद्पिंत सःताः जानकारी बिउगु खः । गजू स्वयेत वःपिं पुरातत्वविद् व संस्कृतिविद्पिंसं थुकिया बारे बांलाक अध्ययन यायेमाःगु खँ धाःगु दु ।
लुयावःगु थ्व स्वंगः गजू सिजलय् लुं सियातःगु खँ धाःगु दु । स्वगलं गजू तग्वःगु ल्वहँतय् धंकातःगु खः । देगः दुने हे मेगु गजू लुयावःगुलिं संस्कृतिविद्तय्सं थुगु देगः न्हापा छतँया जक जुइमाःगु नं अनुमान याःगु दु । संस्कृतिविद् डा. चुन्दा वज्राचार्यं देगःया निनाः, धलिं, त्वरं सिँ, पिने दनातःगु अप्पा व दुने दनातःगु अप्पा स्वयेबलय् थ्व देगः न्हापा जीर्णोद्धार याःगु इलय् पुलांगु देगः मथुंसें पिनें तग्वयेक मेगु देगः दनाः यंकूगु खयेमाः धयादीगु दु ।
‘देगःया दुनेया अप्पा तसकं पुलांगु खनेदु, अले म्हासुगु चां दनातःगु खनेदु, तर पिनेया अप्पा धाःसा न्हूगु थें खनेदु, अले चुना तयाः दनातःगु दु’ वय्कलं धयादिल । संस्कृतिविद् एकाराम सिंया बिचाः कथं नं न्हापा पुलांगु देगः थुने मजिउ धकाः पुलांगु देगः मथुंसे चाकःलिं न्हूगु देगः दयेका यंकूगु जुइमाः ।
वय्कलं नं देगःया दुनेया अप्पा व पिनेया अप्पा स्वयेबलय् न्हापा जीर्णोद्धार याःबलय् पिनें पिनें जक तग्वयेक दयेका यंकूगु अनुमान यानादीगु दु । न्हापा सुनां हे मसिउ कथं देगः दुने गजू लुयावलं नं पशुपति क्षेत्र विकास कोषं धाःसा आःतक स्वः तकं मवःनिगु खँ स्थानीय संस्कृतिप्रेमि जलद वैद्यं धयादीगु दु ।
पशुपति क्षेत्र विकास कोष अन्तर्गत हे लाःगु थ्व देगःया पुनर्निर्माणया निंतिं कोषं हे ठेक्का बिउगु खः । थ्व देगः दनेगु निंतिं तुलसी कन्स्ट्रक्सनं स्वंगू करोड १४ लाखं ठेक्का लाकूगु खः । देगः पुनर्निर्माणया निंतिं पुरातत्व विभागं खटे यानातःम्ह अधिकृत अमृता महर्जनं लुयावःगु गजूया नाप कयाः पूवंक विवरण तयेमानिगु खँ धयादीगु दु । अथेहे पुरातत्व विभागं ड्रोन क्यामरा हयाः लुयावःगु गजू सहितया तस्बिर कायेमानि धासें ज्या दिकेत धयाहःगु खँ कन्स्ट्रक्सनं धाःगु दु ।
LEAVE YOUR COMMENTS